Ka seiñ Hynñiewtrep National Youth Movement (HNYM) Saphai Unit ynne ka sngi hapoh i yahkhmat u President ka West Jaiñtia Hills, u Pynhun Shulet deiwa emlang u General Secretary ka Saphai Unit, u Melki Dhar wa u Vice President ka Saphai Unit, u Shemphang Dhar da lai yachem ki wa u Assistant Executive Engineer, Shangpung Distribution Sub-Division, MePDCL wow dawa u pyndep kreh wei wow pyndait sainar ya waroh ki chrot bordiñ kiwa da pynyieñ nadooh u 2019 hachwa wow wan ka khlam.
Ka seiñ da ong ko wa da yoophylla hadooh katni wa dapoi u snem 2023 leh ym pu dep pyndait ya kini ki chrot bordiñ kiwa da booh ha kiwa boon ki kyntoit yong ka chnong Saphai kiwa da em leh kiwa da jan haap, kamtæ neiliang ka seiñ da dawa ko u Assistant Executive Engineer (AEE) wow phah pyndep noh u leh yeiwa emkaam ya kini ki chrot bordiñ khnang wa ki paidbah wa chong chnong u yoh ki wow riñ bordiñ noh cha ki yung yong ki.
Da e por leh ya u AEE wow phah pynkreh wei wow pynbiang hapoh chi tayaw wei lada ym ye wow leh yeini ym yohsa wow chim da kiwi ki luti, kamtæ u AEE da kular u wow leh wei wow phah noh ya ki Contractor wow pyndep noh yei kreh wa dang sahteiñ.
Ka seiñ da kular ko leh wym chong ngiah wei wow booddien ya ini i kaam.
