Kiwa yahkhmat yong ka Meghalaya SSA School Association (MSSASA) da lai ki wow dawa na ka sorkar wow pynku ko ya ka mang poisa neibynta ki skur SSA ha ka mang tangka yong u snem 2023-24, khamtam hadien wa da sakhi wa ha ki snem wa da dep wa kiwa sikai da hap ki wow mih cha sarok neibynta wow dawa ya ka tulop.
Kini ki dkhot ka MSSASA hapoh i yahkhmat u President, u Aristottle Rymbai da yachem ki ynne ka sngi wa u Symbood Montri Rangbah, u Prestone Tynsong deiwa ya emlang leh u Montri ka chnat puræ puthi, u Rakkam A Sangma wow pynsñiaw ya 4 tylli ki phang dawa yong kiwa sikai SSA kiwa dang sahteiñ.
Hawa klam wa kiwa thoh khubor, u President ka MSSASA da ong u wa i daw wa kiwa shikai SSA da hap ki wow mih cha sarok wow dawa ya ka tulop toh neidaw wa da mang duna palat ya ka poisa da ka sorkar jylla najrong i chah khate ya ka mang poisa na ka sorkar pyrdi.
Da khana u wa neiliang Prestone wa u Rakkam da kular ki wow chimkhia ya kini ki dawa, khamtam wow pynku ya ka mang poisa neibynta kiwa sikai SSA.
Chooh chooh da khana wa iwi na ki dawa toh wow thung noh ya u Chairman wa ki dkhot ka Meghalaya State Education Commission, wow thung noh ya ki kaam sikai kiwa lait ha ki skur SSA wei kawi won ka dawa toh wow pynpoi bait ya ka tulop cha ki Bank Account yong kiwa sikai.
U Aristotle Rymbai da ong u leh wa ini i yachem waka sorkar ha kani ka kynti man ko kawa mihsoh wei em kyrmen neibynta yong kiwa sikai SSA.
