Ka seiñ HANM Narpuh Circle ha ka 17 tarik uni u bnai deilang wa kiwa yahkhmat ka seiñ na Jaiñtia Hills wa na East Khasi Hills hapoh i yahkhmat u President ka Narpuh Circle, u P. Syiemlieh da lai ki cha ka karkhana Topcem kawa em ha Elaka Narpuh, East Jaiñtia Hills dei thmu wow khang tala ka.
Mar ya yoo yeini, da khut ya ki dkhot ka seiñ yow yaklam hajrong ka yurim wa beh kani ka karkhana ya ki tre chnong wa em kamwa 6 ngut wei da yaklam wa u President ka Topcem uwa da tyrwa u chah u kreh ki sa du kamwa 2 snem heiwa ka seiñ ym hun ko yeini wei ki paidbah leh ym hun ki neibhah katkam wa tip ka seiñ, ym em i ya soi soskular chwa wow kreh ki bru ha kani ka karkhana, iwa da pynchrai chooh chooh ya ka seiñ toh ki paradoh parasnaam wa em ha kani ka karkhana da yachah wei da yasaaid ki neibynta kani ka karkhana kiwa man du kam kiwa kreh ki wym toh ki tre.
Ka seiñ da beiñ ko leh ya kitu ki bru wa da pyrchang wow leh Benami wei da maham leh wa neini chakhmat ym toh de wow yoo ya ki bru yong i wow em ki hei liang ka karkhana.
Da pyntip leh cha ka seiñ wa da em boon ki tre chnong wa kreh ha kani ka karkhana nadooh ki Cleaner (48 ngut), Security (33 ngut), ki Helper (9 ngut), kiwa kreh Mines Hyva (14 ngut), ki Carpenter & Gardener (12ngut), ki Peon (6 ngut), ki Electrician (3 ngut) wa kiwi kiwi heiwa 70% kiwa kreh toh kiwa kheiñ kiwa em hapoh ka Workmen Category.
Tangwa ka seiñ da khyrngiat ko wow tip yeini neibhah tang ka chithi thung kreh leh ym em wa yoh wei hajrong kani ka yurim ka seiñ ym chong ngiah ko wei daw yakhun neibynta ki paradoh parasnaam yow pynyoh yei hok yong uwi pa uwi.
Kamtæ da maham wa lada kani ka karkhana ym pynbiang ko yei dawa ka seiñ hajrong ki yurim wa biang, ka seiñ da rai ko wow khut wow wer ya ki paidbah ka thaaiñ wow leh deiwa eh ya kani ka karkhana pynmih khyndaw-bilat.
