“Em chiboon ki skur kiwa ym bien wow pynkrehkaam ya ki School Bus,” yeini da ong u Montri Rangbah ka jylla, u Conrad K Sangma ynne ha Yung Dorbar Chna-aiñ hawa e yei jubab yeiwa da kylli lada ka sorkar thmu ko wow phah pynemkaam da ki School Bus ya waroh ki skur.
Da khana u wa da wanrah ya ka Sustainable Transport and Efficient Mobility Society (STEMS) Programme, wow pynkrehkaam yonglang ya ki School Bus wow pynduna ya i sahkut ki kari ha Shillong, tangwa kiwa boon ki skur artatien ki wow pynkrehkaam ya kini ki Bus neibhah da ong ki wa i kaamram yong ki toh wow hikai wei ymtoh wow pynkrehkaam ya ka School Bus, wei ini man iwi na ki daw wa da chem chitom ka sorkar wow phah pynemkaam da ki School Bus ha ki skur.
Da khana u leh wa hadien wa boon ki skur ym bien ki wow pynemkaam ya ki School Bus, ka sorkar da yaklam wei da chong yalang ko da ki spah tylli wei da pynman leh kamwa 6000 -7000 tylli ki Survey heiwa da sñiaw emkaam wow sdang da ka STEMS deiwa e kti noh ya ini i kaam ha ki Society wa da tipmit ka sorkar. Heijooh i por da ong u wa ka sorkar ye ko u e kti ha ki skur wow pynkrehkaam ya ki Bus lada bien ki.
Da ong u leh wa da em 15 tylli ki skur kiwa ka sorkar da soi soskular ko ki wow pynkrehkaam ya ki Bus wei kini ki skur toh kiwa em ha ka thaaiñ Laitumkhrah-Dhankheti wei lada ya ini krehkaam i, daw ye u pynkrehkaam cha kiwi ki bynta ka jylla.
U Conrad da ong u leh wa em 27,000 ngut ki khynnah kiwa wan skur ha thaaiñ Laitumkhrah-Dhankheti wei 60% toh kiwa pynemkaam ya ki kari samen.
Da em chiboon i yaklam wa ki skur, pulit, ki manbei manpa wa ki bor District wei da pyrchang leh u yakrehlang wa ki skur wow pynkrehkaam ya ki Bus tangwa ki skur artatien i wow leh yeini.
