U MLA ka Baghmara Constituency, u Kartush R Marak da chah ujor u neidaw wa yakhun Election u katwa dang pynkreh u leh ya ki kaam Contract hapoh ki chnat sorkar, wei hajrong ini i chah ujor, neiliang ka High Court ka Meghalaya da phah hajir ko yow paan pynche.
U muktiar yong uwa ujor, u Sujit Dey da khana u wa u John Marak da ujor u pyrchah ya u MLA wa dang jop na Baghmara hajrong i chah pynbaad wa dang pynkreh u ya ki kaam Contract hadooh ka sngi wa lai thap pyrtuid wei man u leh u Class-1 Contractor ha ki chnat sorkar.
U Sujit Dey da ong u wa uwon uwon uwa mihkhmat uwa da chah jied ye u wow chah pyndooh yei man kam uwa mihkhmat katkam ka Article 191 yong ka riti synchaar ka ri India. Da khana u waka High Court da chim ko ya kani ka ujor ynne ka sngi wei da khut hajir ya uwa chah ujor wow e yei pynche.
Da ong wa neiliang u uwa ujor, u John Marak da ong u wa u Returning Officer yong katai ka Constituency da toh u kyntait u ya ki kot ki sla yong u Kartush nadooh i por wa thap pyrtuid wow yakhun Election, wei ye u man wa ymtip u ya ka aiñ.
Kam wow pynkynmoo wa u Kartush R Marak uwa da jop kam u MLA khlem seiñ ha ka Election wa dang dep na Baghmara deiwa jop ya u kyrtong ka BJP uwa wan hei wa ar.
