Ka sorkar Meghalaya ym em yoh ko ya ka No Objection Certificate (NOC) naka Khasi Hills Autonomous District Council (KHADC) yow pynpoi luti rel hadooh Shillong, da pyntip u Montri Rangbah ka jylla, u Conrad K Sangma ynne ka sngi.
Da khana u leh wa da dep yachem u wa u Montri ka chnat Railways, ka sorkar India, yow pyntip cha ki wa kini ki kaam toh wa hap ka sorkar wow yaklam chwa yow pynsñiawthooh ya ki paidbah wei ini toh iwa chim por.
Heiyatoh wa ka luti rel hadooh Byrnihat da khana u wa em ki bynta wa hap u chimkhia wei ka sorkar dang yaklam ko wa kiwa pyrchah yeini wei ye u sdang nyngkong da ka rel kit mar kamwa da yaklam nachwa neibhah kini ki jait rel daw yarap ko ya ka khayi pateiñ.
Da ong u leh wa ka sorkar da klam che ko wa u yaklam wa waroh chwa wow lai chakhmat.
Chooh chooh da ong u wa u Prime Minister Narendra Modi kwah u wa waroh ki nongbah ki jylla toh u pynyabi da ki rel yow pynku ya ka khayi pateiñ.
Kamtæ da ong u wa hawa pait ya waroh kawi ka ri lada pynyabi ya waroh ki nongbah ki jylla daw yoh myntoi bha wei man i leh i thong wa miat yong u PM wei ka chnat Railways leh da pyrchang ko wow poi cha kani ka thong.
Tangwa u Conrad da ong u wa ka jylla em ko yei daw wa kiwi ki eh neibhah i wanrah ya ka rel toh iwa da em i pyrchah da kiwa boon ki seiñ kamjooh kiwa synchaar chnong neidaw wa sñiawkhia ki yei wan psiah ki baar jylla.
“Em hi i sñiawthooh yei emkaam wow em ka rel tangwa emkaam leh wow pynskem yeini i sñiaw ki paidbah wei wow yoh yei chaniah yong ki”, da ong u Conrad.
