Kam chibynta wow pyndooh jait noh ya ka kjut TB ha ka imlang shalang, ka State TB Office, Meghalaya da leh warom ko ya ka World Tuberculosis Day, 2023 deiwa pynman ya ka Rally deilang waka yakob Walkathon deiwa ya krehlang waka Molbio Diagnosis Pvt. Ltd.
Ka phang ha uni u snem toh kawa ong “Yes! We can end TB”, heiwa ya ka TB Rally da kaweh lama da ka Tracy Kharkamni, State ACSM Coordinator, State TB Office kawa da sdang nadooh Directorate of Health Services, Health Complex, Laitumkhrah katwa ya ka Walkathon won da kaweh lama da u Dr. Dukebingstone Lyngdoh, Medical and Health Officer, Civil Hospital, Shillong na Additional Secretariat deiwa lai cha State TB Office, Mawprem
Da wan wow chimbynta da 210 ngut nadooh ki khynnah hadooh ki waheh na ki chnong waphær waphær. Hadien ka Walkathon, da pynman ya ka yalang pynsñiawthooh ha Reid Provincial Chest Hospital, Mawprem heiwa u Dr. Marcel Mawrie, State TB Officer, Meghalaya da khana u chaphang ka thong wow pyndooh noh yei kjut TB hapoh ka jylla ha u snem 2025 deiwa khutlang yei ya krehlang yong waroh.
Da kyntu u leh ya kiwa em ki dak ki chin wa yoh TB wa kynthup yei iñdoh, i mih chit heipor thiah, i ky’oh wa ar tayaw wei i hiar syndet i khia wow wan ki chakhmat yow phah leh ya ki Test wei ki sumaar wa e ka sorkar toh dei mynkna.
Ka Tracy Kharkamni da khana ko chaphang ka Jan Andolan Movement kawa man deiwa ya chimbynta da kiwa chong chnong wei kam chibynta ini da pynman ya kiwa boon ki yakob kiwa man kam chibynta wow pynsñiawthooh paidbah chaphang i kjut TB kam i dro dur, i chna phawar, i chna sur wa kiwi kiwi de wei yow tip bniah chaphang ini i kjut, ki paidbah ye ki wow bood ya ka NTEP Meghalaya ha ki Social Media.
Kiwa jop ha kani ka Walkathon yong ki kynthai:
Kawa yoh nyngkong- Ka Emmiwaka Shadap
Kawa yoh wa ar- Ka Ibasharai Kurkalang
Hei wa le da em arngut kitæ ka Ribanun Lyngdoh waka Soulnavi Wanniang
Kiwa jop ha ki chynrang:
Hei nyngkong- U Ferick Kitboklang Syiemlieh
Hei wa ar- U Bipin Kumar Ray
Hei wa le- U Badonsing Tham wa u Biplob Deb.
Da e khusnaam leh cha kiwa khian rta dooh wa da yoh da ka Abha Nongrum (5 snem) waka Shyamali Chakraborty (53 snem) kam kawa da heh rta dooh.
Da pynkut ya ka kani ka sngi deiwa chim ya ka smai wow man kiwa tip chaphang kani ka kjit, wow man kiwa syndong wei ym toh wow lehbeiñ ya kiwa kjut TB wei wow pyndooh noh leh ya kani ka kjut kat ha u 2025.
