Ka yalang pynsñiawthooh paidbah namo ka Awareness Program wa da pynman da ka Dorbar Chnong Pynthor Langteiñ chirup wa ki pulit ka Jowai Police Station ha ka janmiet ka 25 tarik, da yaklam hajrong kini ki mat ha wah:
(1) I chah thok ki bru samen wa kiwi ha ka Social Media wa ki Smart Phone.
(2) I ktah nei chongkha khynnah.
(3) I pynsñiawthooh hajrong ki kaam krehmon sñiawbha kam ki VDP hapoh chnong.
(4) I yaklam ki paidbah wa ki pulit wow ye u pynneh ya i chongsuk chongsaiñ hapoh dong poh chnong ha ka imlang sahlang.
Ya kani ka pynsñiawthooh da wan ap wan sñiaw da kiwa boon ki waheh wasian, ki khon khynroo khyllood yong ka chnong wei kiwa chemphang wa wan e klam ha kani ka janmiet kynthup ki ya u OC ka Jowai Police Station, u Sunday Manner, ka OC ka Women’s Police Station, ka R.M. Suchiang, heiwa ya ka yalang da pynlai da u waheh chnong ka Pynthor Langteiñ, u Army Lipon, uwa da pdiang burom ya ki bru kamjooh ya kini ki sahep pulit.
Ha i pynsñiawthooh paidbah heiyatoh wa i kaam chah thok lyngba ka Internet wa Smart Phone ha kiwa boon ki kaam ya ki bru paidbah nadooh ki kaam yadai yathied Online næ ki kaam khynroo khyllood ha Facebook wa kiwi de ki kaam kiwa da jooh jia man-i-por ha kani ka ri wei kammon ki bru u stat u pynemkaam ki ya ka Mobile Phone næ Smart Phone yow lait na kam kini ki kaam chah pynbiej næ chah thok kulmar, da khana leh wa ymhoi u Comment kulmar khlem pyrkhat kat ya iwa yoo wa em yow lait nei chah kem næ chah pynsaja ya uwon næ kawon kawon, ymhoi u phah kulmar ya ki dur khlem akor yong ki bru lyngba ki WhatsApp næ Message cha kiwi tawon kawa man pyrchah aiñ.
Da yoh leh chiboon ki kyntien sneiñ na u Sunday Manner hajrong kani ka bynta, wei da yaphyllu yumut wa ki dkhot ka Volunteer Defence Party yong ka chnong deiwa e buit wa kammon u yakreh kaam chirup chirup wa ki pulit khnang wow ye u wanrah yei bha i miat wa i chongsuk chongsaiñ, yow ye u yait na ki kaam sih kaam roi kam na ka dih kiad muaid tanglang, na i dih drugs, ki kaam yakhle, ki kaam tynyap, kaam lute kamtæ ter ter. Ya ki VDP yong ka chnong da yahkhmat da u Chibun Lipon cha kani ka yalang pynsñiawthooh.
Chooh chooh u Manner da sñiawkmen u u yoo ka VDP yong ka chnong wan ko chakhmat wow krehlang neibynta u wanrah yei bha i miat hapoh chnong chirup wa ki pulit yong ka District.
Yow pynkhlan ya i rukom krehkaam ki VDP, u OC da kular u wa u pynsñiaw u cha ki bor wa chañein chadooh u SP wa kiwi ki heh pulit, heiwa u President ka VDP yong ka chnong da paan yumut wa kammon u leh yow tieñ wow duna i yaleh pyrchah ki bru wasih, “Ye hi mo u yoh kam ki lathi ki Torchlight wa kiwi ki tiar wa ki Uniform yow rap man kyrpang chibynta i pynka’it pynkhlan ya ki VDP hapoh ki dong ki chnong ha waroh ka District?” wei yeini leh u OC da kular u wow yarap klam cha ki heh pulit.
Da yoh won ya i pynsñiawthooh hajrong ki kaam wa ymhoi u chongkha khynnah wa man kam i kaam thombor ya ki kynthai khynnah iwa ktah ya i doh i pran wa i chait i khiah kamjooh i pyrkhat pyrdaiñ wa ye leh u pynngat ha ka aiñ POCSO Act, kamtæ hap u yaleh pyrchah ya ki kaam chongkha khynnah ha ka imlang sahlang ha ki dong ki chnong neibhah i rta wa dang khian hapoh ka 18 snem dang man ko ka rta i puræ puthi kamjooh leh i rta wa danglung ym pu chah ka aiñ u poi cha ka kaam manbei manpa.
Da yoh leh chiboon ki ktien sneiñ heiyatoh wa ymhoi u leh pyrchah næ slaitbor ya ki kynthai khynnah deiwa tba ha ki bynta wym tohsap u tba næ kiwi ki bynta wa kyrpang ka khynnah, da yoh ya kini ki ktien sneiñ na ka R.M. Suchiang wei hadien wa dadep ya ki mat wa ki phang yaklam ha kani ka sngi da yoh ya ki kyntien klam e khublei ya kini ki sahep na u Emonlangki O Lipon uwa man leh kam u Convener yong kani ka yalang pynsñiawthooh.
