Ki chakri niam hapoh ka Raij Jowai wa kynthup yow Dolloi, Pator, Langdoh, Sangot, ki Wasan deilang ki Kni yong ki Phra Kur Phra Kmai chirup ki waheh wasian ka Raij ynne ka sngi da mih ki chakhmat ka Yaaw ka Syiem hei wow pyndep ya ka Lehniam Kbai Mooknor.
Katkam i sikai niam wa da pynjooh na warim, kani toh ka lehniam wa nyngkong dooh wei ka yurim yong ka toh wow e wyrta chula cha ka chnong ka Raij hakhmat ka Yaaw ka Syiem hapyrdi kiwa wan yaaw wan haat wa nadooh kani ka sngi, ki chakri niam ka Raij Jowai da sdang ki u leh u pyndep ya ki kaam niam hapoh ka Raij ka chnong katkam ka rukom dustur wa da pynjooh sikai na warim chwa wow poi ki Soo Sngi Le Yaaw yong ka chaad niam Behdieñkhlam.
Ha ki sngi wa bood won ki sarin yong ki lehniam wa toh u pyndep da ki chakri niam ka Raij toh ka Dih Soopen ha Yung Langdoh ha ka sngi Thymblein 29 tarik wa ka Knia Thoh Langdoh kawi na ki lehniam næ knia e ngooh yow Blai Langdoh kawa hap u pyndep ha ka sngi wa bood ka 30 tarik uni u Wisu.
