Ka School Managing Committee yong ka Seiñraij LPS SSA, Mukhap wa em ha Laksein Block ha ka thong wow pynchlur wei wow yohlaad ki khynnah u pynyoo pyntaw sap najrong i puræ puthi, nadooh ka sngi Hat 22 tarik hadooh ka sngi Pynsin 24 tarik uni u bnai da pynman ko ya ka School Sports Meet 2023 heiwa kam ka dak i wai ya kani ka Sports Meet ha ka sngi nyngkong da em i pynhær ya ka lama yong ka skur da u General Secretary Seinraij, u Ialamlang Suchiang wei da pynphooh pynpheiñ leh ya kani ka sngi da ka March Past wa da chimbynta da ka Blue House, Green House, Yellow House wa ka Red House.
Ha ki le sngi yong kani ka Sports Meet, ki khynnah wa da phiah ha ki kyrdan waphær da yohlaad bha ki u pynyoo pyntaw sap lyngba ki yakob wa boonjait boon rukom kiwa kynthup ya ki Race, ki Traditional Sports wa kiwi kiwi kiwa man chibynta ka laad ka luti wow khriñ ya ki khynnah neibynta wow lait ki na ki kaam sih wa boonjait.
Ya kani ka Sports Meet da pynkut ha ka 24 tarik deiwa saam ya ki khusnaam cha ki khynnah wa jop ha ki yakob waphær wei yei naam Best House da yoh da ka Green House katwa yei naam Best Athlete neiliang ki chynrang da yoh da u Ristarsing Suchiang katwa neiliang ki khynnah kynthai won da yoh da ka Eibhawan Langstang.
Ha ka yalang pynkut yong kani ka School Sports Meet 2023 hei pynlai ka Kheinkor Niang, Head Teacher, u Rangdajied Lapasam, Waheh Chnong Mukhap da man u kam u kongsan hei emlang ki dkhot ka School Managing Committee, ki manbei manpa wa ki waheh wasian ka Seiñraij Mukhap wei ya kani ka sngi da pynphooh pynchongchit leh da ki chaad wa ka Mass Drill wa da chimbynta da ki khynnah yong ki House waphær waphær.
