Ki “High Level” toh ki jaitbru ri-loom wa thymme kiwa da e laad ka sorkar MDA wow roi ki hapyrdi kiwi ki 3 jaitbru ka Meghalaya, da pynbaad u MLA ka Umsning, u Dr. Celestine Lyngdoh ynne ka sngi hapoh ka yung dorbar.
Da ong u leh wa ini toh iwa kongsan dooh i kaam wa da ye ka sorkar MDA-I u wanrah hadooh wa nadooh wa em kini, ka High Court ka Meghalaya leh ym chaniah de ko ya ki pulit ka jylla deiwa kdaw wa da phah ko 10 Company ki Central Industrial Security Force (CISF) kiwa ye u krehkaam laitlooid yow pait yei kit tooh ya u mooyong hapoh ka jylla.
Na kini ki daw da ong u wa ka jylla da yoh ko yei naam kam kawa joor dooh i baam tooh na ki jylla waroh hapoh ka ri.
“Ini i pynbaad ymtoh kiwa wan na ki bru wa kamni kamtai tangwa da ki bru wa em kyrdan kiwa ym ye i wow kyntait hi-eh kiwa da klam ym heipor wa chong dih cha tangwa ha ki yalang yalap Election wa em da ki phaw hajar ngut kiwa sakhi wei ini da ktah ko yei dur ka jylla”, da ong u Dr. Celestine hawa klam chaphang iwa ong u Union Home Minister hawa klam paidbah ha Tura haka 17 tarik u Thohlakhmi uni u snem.
Da ong u wa waroh kini ki kaam pyrchah aiñ da leh deiwa em ki bru wa rieh nadien hadooh wa da yoh naam ka jylla kam kawa baam tooh dooh hapoh India.
“Em ki bru kiwa ong lada leh phi ya iwon iwon khlem da em i, man ko ka kaam baam tooh tangwa kini ki jooh ki bru da yaroh lada yoh ki u ya krehlang iwa sñiawsih wow yoo wa da jia hapoh ka ri katni”, da ong u Dr. Celestine deiwa siat cha ka BJP waka sorkar MDA hapoh ka jylla.
U MLA ka Umsning da yooluti u wow yoo wa kani ka sorkar wa katni daw ye ko u kdoh u khoom ya kani ka jaitbru High Level yow ye biang ki pulit wow yoh yei burom wa da dooh ki nadooh wa em kani ka sorkar.
