Ki ar tylli ki seiñ na ri-loom Garo wa kynthup ya ka Garo Students’ Union (GSU) waka A’chik Conscious Holistically Integrated Krima (ACHIK) da pynsñiaw ki yei wym sñiawsuk yei pynkhih ka Voice of the People Party (VPP) hapoh i yahkhmat u President yong ka, u Ardent Basaiawmoit hajrong ka Roster System iwa da wanrah yei sñiaw yaphær jaitbru.
Neiliang ka Bernita Rangsa Marak kawa man kam ka muktiar ka ACHIK, da ong ko wa ini i leh ka VPP da wanrah yei sñiaw yaphær jaitbru hapyrdi ki payu para ka Meghalaya deiwa kam ki wa em i leh chilliang ya kawi na ki jaitbru ka jylla.
Ka ACHIK da beiñ ko leh yei thmu wow pynman yei lai paidbah pyrchah ya ka Roster System wei ini toh wow pynchlur yei sñiaw wa em itæ i leh chilliang ya kawi na ki jaitbru ka jylla.
Da ong leh wa kani ka Roster System toh kawa da pynmih hukum da ka High Court yow pynkrehkaam yei yabhah kreh namo ka Job Reservation yow pyntikna wym em i leh thok wei leh chilliang hawa thung kreh kamjooh yow pynkhlan ya ka Reservation Policy.
Chooh chooh da kdaw wa i bhah wa ki Garo da yoh ki toh du kamwa 33% hawa chim yukheiñ wei yeini leh da pdiang da ka High Court ka Meghalaya kamtæ da pynmih hukum wow pynkrehkaam da ka Roster System hapoh ka Reservation Policy ka jylla.
Kamtæ da ong wa lada pyrchah man ko leh i pyrchah ya ka hukum ka High Court wei neiliang ka seiñ ACHIK daw pyntikna ko wa iwon iwon wa pyrchang ka VPP daw maad dei pyrchah wa joor na ki paaid ka ri-loom Garo.
Neiliang ka GSU won da beiñ ko yei klam u Ardent deiwa ong wa leh u yeini du neidaw yong samen yow pynku yei kaam Politics u deiwa yah bakla yei krehkaam ka Roster System kawa da krehkaam deiwa miat wei deiwa khooid.
Ka GSU da pynbaad ko wa Ardent kopsar kyrchaan u yei thung kreh dei tooh, dei chim poisa, deiwa thung ya kiwa tipmit tipmat donhi wei kwah u wow pyndooh yei hok ki Garo wei ym em poi pyrkhat ki wa u Ardent kat i kyrdan i burom u kwah u wow leh yeini.
