Katwa dang mih ki sngi, i chongkha khlem kynjoh i rta da rap ku i wei hajrong kani ka phang, ka Society for Urban and Rural Empowerment (SURE) ryngkat wa i kyrchaan ka District Social Welfare Officer (DSWA) West Jaiñtia Hills District, Jowai da pynman ko ya i pynsñiawthooh wa chi sngi ha ka 27 tarik uni u bnai.
Haka yalang wa pynman ha Shangpung College, West Jaiñtia hills, da yoh i pynsñiawthooh hajrong i ktah nei chongkha khynnah wei kammon ktah i yei doh i pran khamtam ki khynnah. Ya ini da klam da ka S. Nartiang kawa man kam ka Mid-Level Health Provider (MLHP) hapoh ka Mihmyntdu Sub-Centre. Ka S. Nartiang da ong ko wa hawa ki khynnah chongkha ki khlem toh por, ym du i chah ktah hei puræ tangwa ha i rukom man i doh i pran khamtam ktah i ya ka bor pyrkhat pyrdaiñ yong ki wei kamjooh ya ka manyung wa ka imlang sahlang.
Haka kynta wa bood da yoh i klam hajrong ka aiñ “Prohibition of Child Marriage Act 2006” yeiwa da pynche da ka Niwanka Shylla kawa man ka Zonal Supervisor yong ka Link Worker Scheme naka SURE. Ka Niwanka Shylla da pynche ko hajrong kani ka aiñ wa khang pyrchah yei chongkha khynnah kamjooh ki kyndon pynchitom ya kiwa tyngkheiñ ya ka. Da ong ko wa da thung ya ki Protection Officer ki wow yarap ya ka sorkar wow pynkrehkaam ya kani ka aiñ kamtæ da kyntu ko ya ki khynroo khyllood wow lait ki u ngat ha kani ka aiñ.
Ka Darimika Lywait kawa man ka Zonal Supervisor ka SURE da pynlai ko ya ka yalang wei ya ki kyntien pdiang burom da yoh na ka K. Langbang.
Da yoh leh yei phyllu yumut hajrong kani ka phang kawa emkaam wei da yoh leh i klam na ka Pasqualina Lamare kawa man ka Centre Manager ka Project FOCUS hapoh ka SURE.
Ha kani ka sngi waroh kiwa sikai wa ki khynnah wa kynjoh palat 150 ngut da yoh myntoi ki.
