Ka Seiñ Kynthai Welfare Society Mihmyntdu (SKWSM) dei yarap poisa na ka yung krehkaam yong ka District Social Welfare Officer, Jowai ha ka thong wow pynchlur ya ki khon kynthai khyllood kammon wow tip ki u yieñ ha ki kjat yong ki dahi deiwa tip u leh yei kaam soor that soor sula wa i chna baam lyngba ki soh ki pe wa kiwi ki jait baam, ha ka sngi Hat 30 tarik da pynmna ko ka yalang wai pyrda neibynta ka e sikai wa le bnai ka wow man ha Don Bosco Secondary School, Mookymphad Mihmyntdu.
Ha ka yalang yong kani ka sngi hei pynlai ka Baiahunlang Phawa, President SKWSM da yoh yei klam pdiang burom na ka Sister Mari Joseph kamjooh leh ki kyntien e mynsien ya ki khon kynthai khyllood na ka Sister Sheela Thomas, Headmistress Don Bosco Secondary School, Mihmyntdu.
Ka J. Synnah, District Social Welfare Officer, West Jaiñtia Hills hei e kyntien kam ka kongsan da yaroh ko ya ki dkhot ka SKWSM wei da kitbok kitrwiang ko leh yow nang ye chooh ka seiñ u kreh rap bha neibynta i miat i bha ka imlang sahlang yong ki khon kynthai kamjooh ka chnong ka thaw.
Neitæ da khana ko leh wa ka sorkar e ko ya kani ka Scheme næ ka laad yarap cha ki khon kynthai toh wa yoo ko yei eh i khoo wa hap ki khon kynthai khyllood u maad u chem neidaw wym tip ki ya ki laad ki luti u kreh u khih, kamtæ yooluti ko deiwa pynman ya kani ka e sikai hei pait ka Seiñ Kynthai Welfare Society Mihmyntdu u mih sakhiat kitæ ki khon kynthai næ ki manbei kiwa ye u yieñ ha ki kjat yong ki dahi.
Chooh chooh iwa khaddooh kyrsu kyntu ko ya ki khon kynthai kiwa wan chah sikai wow man kiwa pynlai yumut wei chimkhia u wan tikna cha kani ka e sikai khnang wa ini i pynlut pynsep ka sorkar u man i iwa mihsoh mihsla wei u man i leh i myntoi wa khroo ya ki khon kynthai khyllood ha ki por ki sngi ki wow wan.
