Ka seiñ A’chik Conscious Holistically Integrated Krima (ACHIK) da jubab ko yei pynche ka VPP wa ka ymtoh ka Party wa pynyaphær jaitbru heiwa ka ACHIK da ong ko ki MLA ka VPP hap ki wow pyrkhat yei daw wa ka High Court da hap ko wow tuklar lada ymtoh wym em itæ i leh bakla hei thung kreh hapoh ka Reservation Policy.
Da ong wa ini da pynmih leh boon ki yukylli hadooh katwon khooid i thung kreh wei ki MLA hap ki wow sñiawthooh yeini kiwa da pynbaad wa em i chah leh chilliang ya kawi na ki jaitbru neibhah kani ka Reservation Policy toh kawa da pynkrehkaam da ki phaw snem wei lada em i duna toh i kaam ki MLA wow pynbait yeini.
Chooh chooh da ong wa ki MLA ka VPP toh u pait bniah bha ki yei rukom thung kreh yow pyntikna wa man i iwa khooid wa khlem leh chilliang wei toh u pdiang ki leh yei pynsñiaw yong kiwi ki jaitbru wei wow krehkaam ki wow kduplang ya waroh hapoh ka imlang sahlang.
Da ong leh wa ka seiñ ACHIK toh kawa ngait yei imlang sahlang deiwa suk wei da kyntu ki leh ya u President ka VPP wow wanrah yei dawa ka seiñ yei booh ya ka Winter Capital ha Tura kamjooh wow rah ya ka Additional Secretariat wa ki Head Office/Department cha ri-loom Garo wei ini daw pynyoo wa ka VPP ymtoh ka Party kawa pynyaphær jaitbru kawa pyrkhat du yei myntoi kawi donhi ka jaitbru iwa daw pynpiah leh ya ki jaitbru iwa daw ktah won yei roi i paar ka ri.
Kamtæ da ong wa waroh ki seiñ saiñhima toh u kreh ki neibynta i bha i miat yong waroh nadooh wow pynbiang yeiwa emkaam yow wanrah ya ka roi ka paar kawa salonsar.
