U Montri wa pait ya ka chnat Bordiñ ka jylla, u Abu Taher Mondal da pynsñiaw u chiboon i eh i khor wa chem ka chnat iwa pynman ya ka wow pyndooh bordiñ namo ka Load Shedding.
Da ong u wa ka jylla emkaam ko hadooh 200 Million Unit, tangwa kamwa man katni ka jylla em ko du 88 Million Unit kamtæ i duna da kynjoh i cha ka 112 Million Unit ka bordiñ. Da ong chooh chooh u wa waroh chi kattu ka Meghalaya jooh yoh bhah ko lyngba ka Central Share hadooh 75 Million Unit, wei iwa pynmih hi na ka jylla man i hadooh 60 Million Unit.
U Mondal da ong u wa ka sorkar sñiawkhia ko ya i chem chitom ki paidbah ka jylla nei tynyap bordiñ deiwa ong wa ka sorkar ym yohsa ko wow pynkrehkaam ya ka Load Shedding ha Meghalaya neibhah kiwa boon ki thaw pynmih bordiñ ka jylla toh ki Hydel Power Project kiwa hap wow chaniah bait ya u slap wa ki wah, wei kam ha ini i por em leh ki bhah na ki thaw pynmih bordiñ ka sorkar pyrdi tangwa da hap wow khang noh ya ini i bhah wei ini da pyndooh i chiboon ki Unit ka bordiñ wa toh wow yoh ka jylla.
Da ong u leh wa kawi na ki laad wa ye wow yarap heiyatoh wa ka Bordiñ toh ka Power Banking namo i e kylliang ya ka bordiñ, tangwa neidaw wa joor i dawa yei bordiñ cha kiwi ki jylla, ki thaw pynmih bordiñ ym ye ki wow e bordiñ cha ka Meghalaya.
Heiyatoh wa i pynbait yei por tymplæh bordiñ i wym ktah ya ki paidbah, u Montri da ong u wa mar pahooh i bordiñ, neiliang ka chnat leh daw pyntbian ko yei por.
