Ynne ka sngi ka East Jaiñtia National Council (EJNC), Central Executive Committee, da e dorkhat ko ha u Deputy Commissioner ka East Jaiñtia Hills yow ujor wa em i kit mooyong kamjooh i chalan mooyong chapoh Meghalaya pyrchah ya ka aiñ da ki karkhana pynmih khyndaw bilat wa em hapoh ka District.
Ka seiñ da ong ko wa da yoh ko wow ksoh ya kawi ka truck wa kit mooyong cha ka Star Cement wei da chem wa biang ko ki kot ki sla kam ki eWay Bill, ki Delivery Challan wa kiwi de tangwa ym em won ka muhor yong ka DMR katkam ki kyndon wa da pynmih lyngba ka Notification No. MG19/2019/189, Dated Shillong, the 08th of November 2022, Mining and Geology Department.
Kamtæ ka seiñ da ong ko wa katkam ki kyndon, i kit ya ki mar pohkhyndaw chapoh ka jylla emkaam ki wow yoh bor na u Secretary ka chnat Mining & Geology wei ka chant Mining & Geology hap ki wow pynsakhiat ya kini ki kot ki sla deiwa em ka muhor ka DMR wei kini ki kari wa kit mooyong ym em ki ya kini wei ini da pynman ko ya iwa leh kini ki truck wa kit mooyong wow man i pyrchah ya ka aiñ.
Hajrong ini u DC da kular u wow thoh cha ki sahep wa pait yeini yow paan yei pynche.
Ka seiñ da ong ko leh wa toh u phah ya ki DMR Check Gate wa ki pulit wow pynsangeh ya kini ki kaam pyrchah aiñ neibhah da ktah ko ya ki bru wa khih hapoh ka District wei lada ym leh yeini, neiliang ka seiñ daw leh hi ko yeiwa emkaam neibynta i myntoi ki paidbah wa ka District hi waroh kawi.
