Da: U Jesper Bareh, Ladrymbai ‘B’, East Jaiñtia Hills
Katwa dang lai ki por ki sngi, i boon ki bru cha ki thaw sor hapoh ka jylla leh dang joor i, wei yeini da sakhi ymtoh du ha sor Shillong næ ha sor Jowai tangwa wot ha sor Khliehriat leh da yoo da chynna yeini. I yabeh neibynta i stat, i kreh mylla, ki thaw sumaar, ka yaaw ka haat, i khayi pateiň natlor kiwi tawon wa emkaam wa hakhmat tam hei manbru longbru da pynman ko yei boon bru wa i khynñia bru ha ki sor.
Katwa i boon bru won da wanrah ko yei boon ki kari ki motor kiwa lai wa wan heiwa da wanrah nawon sa i khynñia wei sahkut ymtoh du ha Shillong næ Jowai tangwa da jia leh ha thaaiñ Ladrymbai wa ha Khliehriat. Boonsien i thmu yong i wow yabeh yei por la cha ki thaw puræ puthi, næ cha ki thaw kreh thaw mylla khamtam hei kjut i chitom da man iwa sepai du neidaw i sahkut kari ha kini ki ar tylli ki chnong ka East Jaiñtia Hills iwa jia man-ka-sngi.
I daw wa jia ini waroh toh nei wym em ka chnat pulit watoh u pait u sylli yei lai i wan ki kari ki ha sarok namo ka Traffic Police Branch ha kani ka District. Da sakhi ya ki kari khian wa pynyeiñ katwa ngait katwa mon hi-eh ki harood u sarokbah NH-06 la ha Ladrymbai næ Khliehriat. Chooh chooh, ymtoh du kat iwa yoh hi-eh ki u pynyieñ kari harood sarok, tangwa sa i kyruiñ-dien (U-Turn) kari ki katwa ngait hi-eh hapyrdi u sarok hakhap wa boon wa khynñia ki kari wa ki bru wa lai wa wan.
Neitæ chooh chooh, sa iwi na ki daw wa pynman yei sahkut kari man-ka-sngi toh i wym mano ka sorkar u pait u yoo, u pynmiat u pynbha yei man i long u sarok Ladrymbai Bypass.
Hei yong sakhiat ya uni u sarok Bypass da chna kyrpang yow lait na i sahkut næ i khynñia kari ha ki thaaiñ Ladrymbai, kat u yoo neidaw wa sih wei pai thlu ware uni u sarok chawa palat da pynman ya ki kari nadooh ki kari heh hadooh ki kari khian wow lai u wan na Ladrymbai bait iwa da wanrah won yei khynñia wei sahkut kari wa man-ka-sngi natloor wada khynñia chwa ki bru wa yabeh cha yaaw cha haat, cha thaw puræ puthi næ cha ki thaw kreh thaw mylla najrong wa wanrah ko ya i maa yei mynsien bru khamtam ki khynnah skur wa ki tymmen chadæ wa lai wa wan na uni u sarok na kini ki thaw sei wym biang ki luti lai-kjat narood sarok namo ki Footpath.
Kattu mih u dak kylli wa hakhmat tam ya ka sorkar kamjooh ya u Montri ki kaam pohyung (Home Minister) toh ini: Ka East Jaiñtia Hills kawa da jan dap kattu la 11 snem, ym pu em i hok ko mo wow yoh ko ya ka Police Traffic Branch?
Katkam ki kyndon ka sorkar, katwon snem u dap ka District hadooh wow yoh ya ka Traffic Branch neibynta wow pait u yoo yei rukom pynlai kari ha ki sarok khamtam ha ki sarokbah (National Highway)?
Kammon wa ka sorkar kyruiñ ko cha ka East Jaiñtia Hills da ki khmat wa thlah heiyatoh weini hawa kani ka District toh kawa pynyabi ya ki chnong ka jylla wa kiwi tawon ki jylla cheini cha thaaiñ mihsngi yong ka ri.
Dep neitæ wonhi, weileh ka chnat PWD watoh u pait ya u sarok wym mano ko ya uni u sarok Bypass? Lymtoh da ka, yi won thaij wow chna wow pynmiat yei man i long wa sih wa pai thlu yong uni u sarok Bypass?
Kiwa chong chnong yong kani ka District kamjooh wa ki lok wa lai wa wan hoi hi mo u takhooh u maad ki yeini i chitom iwa man-ka-sngi? Katwa kamtæ, nga kam uwa chong chnong wa em i kitkhlieh yei bha i miat ha ka imlang sahlang kamjooh ha ka District wa ha ka jylla hi, kyntu O ya ka sorkar wow pait ko yeini i eh i khor wa chem wa takhooh kiwa chong chnong kamjooh leh wow pynbiang pyntoh yeiwa duna i tymbuiñ heiyatoh weini i liang neibynta i suk i saiñ yong waroh lang ha ki por wow wan.
