“Ka sorkar pyrdi wa ki sorkar jylla toh u ya krehlang ki kamwa leh nachwa yow jop hawa ku kiwa yoh COVID-19 nadooh wow yada kamjooh wow kdoh u khoom,” da ong u Dr. Mansukh Mandaviya, u Montri ka sorkar pyrdi wa pait yei chait i khiah hawa yaklam lyngba ka Internet wa ki Montri ki sorkar jylla, ki Principal Secretary wa ki Additional Chief Secretary ynnin ka sngi.
Da ya emlang leh u Dr. Bharati Pravin Pawar, Montri khynnah kani ka chnat yow pait yei pynkhreh i yada kamjooh kammon wow kdoh u khoom ya uni u khñiang hadien wa ku biang kiwa yoh ha ki kattu katni ki jylla ka ri kamjooh leh yow booddien yei e tika.
U Montri da phah u ya ki sorkar jylla wow man ki kiwa da pynkhreh wei wow pynman ya ki Mock Drill ha ki Hospital ha ka 10 wa 11 tarik uni u bnai wei wow booddien leh kammon da pynkhreh ki khlieh District ha ka 8 wa 9 tarik uni hi u bnai.
Da phah leh wow pait na iwon i thaw wa boon kiwa yoh kamjooh kiwa yoh ya kiwi ki jait wa sariem wa ki dak ki chin wa yoh COVID-19 (ILI/SARI Cases) wei wow phah Test chiboon ki nongmuna yow tip tikna uwon u jait COVID-19 yoh ki bru.
Da chem leh wa 23 tylli ki jylla toh kiwa duna bha leh ki ya ki Test, kamtæ u Dr. Mandaviya da ban joor u hajrong ki 5 tylli ki phang kitæ toh ‘Test-Track-Treat-Vaccinate & Adherence to COVID Appropriate Behaviour’.
Ha India katni da sdang em kamwa 4000 ngut kiwa da yoh COVID-19 nadooh kini ki kajiak sngi kani ka tayaaw heiwa ha ka tayaaw wa dep da em kamwa 571 ngut kiwa yoh man-ka-sngi. Hapoh ka pyrthai won kiwa yoh da em ki 88,503 ngut man-ka-sngi wei 62.6% na kini toh wa em ha ki 5 tylli kiwi ki ri ha kani ka tayaaw wa dep.
Ha India palat 90% ki bru da dep yoh tika ki tangwa duna won kiwa wan wow chim yei tika pynkhlan.
Kamwa man kattæ kiwa boon dooh kiwa yoh COVID-19 toh kiwa em ha ki 8 tylli ki jylla ka ri India wei 10 tylli ki District wa em 10% kiwa yoh na kiwa chah Test namo ka Positivity Rate hapoh jylla Kerala, Maharashtra wa Delhi wa 5 tylli ki District wa em 5% ka Positivity Rate ha Karnataka, Kerala, Maharashtra, Delhi, Himachal Pradesh, Tamil Nadu wa Haryana.
Ha kani ka yalang da chimbynta leh da ka Dr. Mazel Amapreen Lyngdoh, ka Montri ka chnat i chait i khiah ka Meghalaya kamjooh kiwi de ki Montri kani ka chnat yong ki jylla ka India.
