Hadien wa beiñ ki paidbah yei pynmih khubor ka seiñ HITO West Jaiñtia Hills District kawa da beiñ yei dai wei siat tim ha Jowai ha ka sngi Good Friday, neiliang ka seiñ da e ko yei pynche hajrong ini waka yurim wa da pynmih ko ya ka khubor.
Ka seiñ da ong ko wa tip hi ko wa em ki Christan wa im ja-kpoh na i ya dai ya thied tim wei tip hi leh wa waroh ki jait niam embynta ki wow kamai ja-kpoh na ka tim.
Na itæ i daw ka seiñ burom ko ya kitu ki pli neibhah wa toh ka sngi kyrpang yong ka niam ki.
“Hawa phi ya krehlang, ya imlang heijooh i kaam, ileh wa du chi sng ar sngi ha ka chi snem ym burom ya itæ i ngait niam yong kiwi.”
“I jooh man ko ya ki Christan leh, ya ka sngi kyrpang yong kiwi ki niam toh u ya ksohkti lang wei wow burom yeiwa ngait yong kiwi, itæ toh ka burom kylliang,” da pynche ka seiñ.
Da ban joor leh wa ka tim hi ym ye u len toh ka kaam yakhle.
Da ong leh wa ym em da dawa wow khang ya kani ka dustur wei toh u lai ko kamwa jooh man hi deiwa booh ya ki kyndon wow e chuti noh ha ka sngi kyrpang yong kiwon kiwon ki niam neibhah ha Shillong wa ha Ladrymbai ki pynyoo ki yei burom.
Kamtæ da ong wa hawa beiñ toh u pyrkhat sani bha neibhah ka seiñ ka em bait ko ya itæ i burom markylliang ha kiwon kiwon ki bynta khnang wow man ka jaitbru wa yatylli wei lada dooh noh ya ka burom kylliang daw chim kabu kiwa poi wiar yei piah ka jaitbru yong i neibhah i yatylli daw man ko ka stieh ya ki pateiñ wow wan.
Khaddooh da ong wa hapoh ka HITO da em ko ki dkhot na waroh ki jait niam deiwa burom uwi ya uwi wei ya ksohkti lang ki wow chakri ya ka jaitbru kam chi payu para.
Puræ leh: Beiñ ka HITO yei dai wei siat tim ha Jowai ha ka sngi Good Friday
