Ha ka 9 tarik uni u bnai, kamwa jooh leh man-u-snem hachwa wow hiar rep hiar riang ka Seiñ Raij Tuber, Tuber Kmai Chnong, East Jaiñtia Hills District, da pynman ko yei lehkmen Chaad Suk-Kara hajan ka Khloo Blai.
Ha kani ka sngi ka Seiñ Raij Tuber da pynman ko leh yei pynkup burom ya kiwa yahkhmat nadooh u Kyrmen Shylla uwa man kam u kongsan ha kani ka sngi uwa man leh kam u MLA ka 6-Khliehriat Constituency heijooh i por u Montri ka sorkar jylla, u Justine Dkhar, MLA warim ka 6-Khliehriat Constituency, ya u Lasky Rymbai Dy. CEM ka JHADC, uwa man leh kam u symbood kongsan, u Lakhon Dkhar, EM ka JHADC, u Madonbai Rymbai, Ex-CEM ka JHADC, deilang ya ki 10 ngut kiwa ksohkaam warim wa dadep chong ngiah yong ka Raij, kitæ toh u Wh. Helping Phawa na Mutong uwa jooh ksoh kam u President (Rangbah Mansan) kamjooh u Ex-MDC ka 21-Tuber Constituency, u Wh. Bewill Shylla na Sabah Muswang, Ex-President (Rangbah Mansan), u Wh. Saron R Ksoo, Tuber Chohchrieh, Ex-General Secretary (Rangbah Longsan), u Wh. Michael Phawa, Tuber Kmai Chnong, Ex-General Secretary (Rangbah Longsan), u Wh. Kran Lyngdoh, Tuber Kmai Chnong, Ex-General Secretary, u Wh. Ham Siangshai, Ex-General Secretary, u Wh. Lowill Lyngdoh, Ex- General Secretary, u Wh. Tolong Dkhar, Ex- Genral Secretary, u Wh. Ribun Sana, Ex-General Secretary wa u Wh. (L) Bud Chyrmang, Ex-Adviser (Rangbah Sai Ñia) kam ka dak wow pynyoo yei sñiawngooh sñiawburom wei yaroh ya ki kaam wa bha wada synniang ki cha ka Raij.
U Wh. Harvis Phawa uwa man leh u President Rangbah yong ka Raij Tuber hei klam yong oo heiyatoh wa ini i pynkup burom da ong u i kam kiwa ksoh kaam kamjooh ka Raij hi waroh kawi sñiaw i wa toh wow e i yaroh ya kiwa yahkhmat nadooh u MLA warim kamjooh ya u MLA wa katni wei kamjooh leh ya ki MDC warim wa kiwa katni kiwa da e ya u synniang u bynhei, u muhor u kynthiar cha ka Raij neibynta wow pyntyllung ya ki kaam chakhmat. Da ong u leh wa kam uwa yahkhmat yong ka Raij wym sñiaw u kun ha mynsien yeiwa da yoo ki khmat khlem da pynyoo yei burom markylliang hanlada man i iwa khian leh.
Da ong u leh wa u Kyrmen Shylla nadooh wa sdang u lai luti ya ka saiñ hima sima itæ toh nadooh u snem 2017 hadooh 2023 da e u ya u muhor u kynthiar cha man kawi pa kawi ka dong (Club) wa chna rong hapoh ka Constituency yong ka 6-Khliehriat kiwa haap hapoh ka Raij Tuber. Iwa sñiaw makhane tam hadooh kattæ kattæ toh du hapoh 5 snem i lai luti yong oo kam u MLA kam u Montri sorkar, da ye sakhiat u pynyoh hadooh 7 tylli ki Khnap Thang bru (Kambel Chullai Eco-friendly Crematorium) cha ki Seiñ Raij chnong waphær waphær hapoh ka Raij Tuber khlem da khieñ cha baar ka Raij Tuber neibynta u pynsuk ya ki khon ka Seiñ Raij heipor wa jia iwa jaaw. Najrong kini da leh u chiboon kiwi tawon ki yarap.
U Kyrmen Shylla hei klam yong oo kam u kongsan ha kani ka sngi da pynsñiaw u yei i sñiawngooh ya ki paidbah kiwa da pynjop emburom biang ya oo khnang u yoh biang u pteiñ ya ki kaam wa dang sahteiñ. Da ong u leh sñiawngooh u hadooh kattæ kattæ ya ki khon ka Raij Tuber kiwa da e i chaniah ha oo tylli tyllang la kam u tre chnong tre thaw hi. Da e khublei u leh ya kitu ki lok ki wym yoh u e Vote wei lyngba i duwai yong ki dapoi biang u hei bor kam uwa chakri yong ki. Da ong u leh wa kam u Montri wym toh u pait u du yaka Constituency, u pait lang u leh yaka jylla hi waroh kawi. Da kular u leh hapoh kani ka por krehkaam wa 5 snem u pynyoh sarok u nadooh sarok Highway (Khekyllang) cha Chaad Khloo Blai, khnang yow pynsuk ya ki paidbah hawa em kam kini ki yalang heijooh i por yow suk wow lai cha Khloo Blai heipor u Langdoh leh u yaka kñia ka khriam.
U Justine Dkhar kam u MLA ha kitu ki por yong oo da pynyoh Scheme u haduh T. 2,25,00,000 heiyatoh wa ka VIP Cum Public Gallery neibynta u pynchna pynbha yaka Biar Blai ha Aitnar yow pynsuk yaki paidbah hei leh niam Behdieñkhlam. Da yarap pynyoh u leh hadooh 3 tylli ki Khnap Thangbru (Kambel Chullai Eco-friendly Crematorium) ha Seiñ Raij Chnong Khliehriat (Raij Tuber), Seiñ Raij Chnong Mukhaialong (Raij Tuber) waka Seiñ Raij Chnong Khlieh-Myntriang wa kiwi kiwi ki yarap.
Chooh chooh ka Seiñ Raij dap ko dei mynsien sñiawngooh sñiawburom ya u Lasky Rymbai, Dy. CEM uwa da yarap lyngba ka MDC Scheme yow pynchna yaka yung Langdoh Raij wa kiwi kiwi ki yarap. Da sñiawngooh leh ya u Lakhon Dkhar, EM JHADC uwa da e ya u muhor u kynthiar neibynta wow chna yaka yung Duwan Langdoh Raij Tuber. Da sñiawngooh sñiawburom leh ya u Madonbai Rymbai kam u CEM heitu ki por chirup u Helping Phawa kam u MDC da pynpsiah ki yaka Behdieñkhlam Raij Tuber hapoh ka Financial Assistant Council Own Fund yow pynyoh poisa man-u-snem cha ka Behdieñkhlam. Sñiawngooh u leh wada yarap u cha ka 7-Thyndai Child Care Institute Cum Counselling Center kawa da pynlai daka Seiñ Raij Tuber Women’s wing.
Ka Seiñ Raij Tuber da dap ko leh dei mynsien sñiawngooh sñiaw burom cha waroh ki waheh wa kitkaam kiwa da kdaw pyrtuid haneiñ wada synniang ki ya ki bor ki sor, ki por ki der, i bor pyrkhat deiwa synniang u bynhei u muhor u kynthiar yong ki cha ka Raij. Ya ini waroh to u Blai Tre Ki Rot Kynrad wow nang theh u yei kyrkhu kyrdoh ya phi liang wanang.
Khaddooh khatwai ka Seiñ Raij Tuber dap ko dei mynsien sñiawngooh sñiaw burom cha waroh ki waheh wasian, ki manbei manpa, khynroo khyllood, ki diah mai kiwa da wan embynta lang hei wow pynphooh pynphieñ yaka Chaad Suk-Kara khamtam ya u muhor u kynthiar wa da e phi.
