29 na ki 30 ngut ki Montri Rangbah wa katni yong ki jylla ka ri India toh kiwa dap klur heiwa hei nyngkong toh u Montri Rangbah ka Andhra Pradesh, u Jagan Mohan Reddy uwa em ya ka poisa deilang ki thaw ki bhaw, ki yung ki sem wa kiwi de nadooh ki kari iwa da pynman ya oo wow chongdor u T. 510 klur katkam wa chim yukheiñ da ka Association for Democratic Reforms (ADR) wa da yoh ki lyngba ki Affidavit heipor wa pynman Election.
Kawa duna dooh i chongdor toh ka Montri Rangbah ka West Bengal, ka Mamata Banerjee kawa em waroh T. 15 lak, katkam ka yukheiñ ka ADR.
U Montri Rangbah ka Arunachal Pradesh, u Pema Khandu da em u hei wa ar deiwa chongdor u T. 163 klur wa kyntup ya ka poisa deilang wa ki thaw ki bha wa kiwi de. Hei wa soo da em u Montri Rangbah ka Nagaland, u Neiphiu Roi uwa chongdor T. 46 klur.
Kiwi de na ki jylla ka North East wa em pyrtuid ha ki 10 ngut kiwa mahajon dooh toh u Montri Rangbah ka Assam, u Himanta Biswa Sarma uwa chongdor T. 17 klur uwa da em hei wa phra, u Montri Rangbah ka Meghalaya, u Conrad Sangma da em u hei wa khynde deiwa chongdor T. 14 klur katwa hei chiphaw da em u Montri Rangbah ka Tripura, u Manik Saha uwa chongdor T. 13 klur.
Ini mut i na ki 10 ngut ki Montri Rangbah wa mahajon dooh, 5 ngut toh kiwa na ki jylla ka North East.
Kiwi de ki yukheiñ wa ADR ye phi wow yoh heini.
