Ka Centre of Excellence for Natural Resource Management & Sustainable Livelihoods, MBDA ynne da pynman ko ya ka e sikai wa tip kam ka “Expanding Areas of Plantations of Areca nut and Other Commercial Species in Meghalaya: Critical Review of the Changing Landscapes with Reference to their Ecological impacts” namo ka e sikai hajrong i nang heh ki thaw thung kwai wa kiwi ki mar rep wa pynlai yaaw wei kammon da pynylla dur wei ktah i ya ka rymaw ha Meghalaya. Ya kani ka e sikai da pynman ha Moreau Institute of Integrated training (MIIT), Shillong.
U Dr. S. Aushutosh, uwa man u Co-Chairman & Director Centre of Excellence for Natural Resource Management & Sustainable Livelihoods, MBDA da e u ya ki kyntien lamphrang hajrong kani ka e sikai heiwa da khana u wa da chem wa ha ki 11 snem i thung ya ki dieñ rep da ku ki da 300% ha Garo Hills wei kiwa boon toh ki dieñ kwai.
Chooh chooh da ong u wa katkam wa chem ka Community Led Landscape Management Project (CLLMP) wa kyrchaan da ka World Bank da antaad wa da em 49.61 lak tylli ki dieñ kwai ha ki khloo yong chnong kiwa em ha ki 161 tylli ki chnong wa pait ka CLLMP.
Kani ka e sikai toh hajrong wow pait bniah yei rep du ya uwi u jait (Monoculture) kam u kwai, dieñ jri, cashew, khontara wa kiwi hapoh Meghalaya. Kiwa chimbynta ha kani ka e sikai da sñiawthooh ki kammon i rep ya kini ki mar wa pynlai yaaw (Cash Crops) ktah ki ya ka rymaw.
Katkam wa man katni ki warep pynkylla ki ya i thaw katkam wa emkaam ki wei emkaam leh u sñiawthooh ki yei myntoi wow thung leh ya ki dieñ wei kammon wow pynneh ya i khyndaw khnang wow neh slem ini i rep yong ki.
Ki bru chemphang wa da wan ynne ka sngi toh kiwa na NEHU, MBDA, ICAR, Soil & Water Conservation kiwa da klam jarong kammon chah ktah ki khloo ki kjma manda joor ka i rep ya ki jhoor ki jhep wa pynlai yaaw.
