U Montri Rangbah ka jylla, u Conrad K Sangma da ong u wa ha kani ka tayaaw ka sorkar u yaklam ko yei pynkrehkaam ya ka ‘Roster System’, heiwa da ong u wa hadien i yaklam hapoh ka sorkar chwa, daw khut won ya ki seiñ saiñhima wei hadien won ya waroh kiwa embynta.
Hawa klam wa kiwa pathai khubor ynne, da ong u wa ka sorkar dang pynkhreh ko yeiwa emkaam yong waroh wei kammon wow sdang yaklam hajrong ka ‘Roster System’, deiwa pynlang ya ki kot ki sla wow bichaar bniah ya ka hukum ka High Court.
U Conrad da ong u leh wa kani ka mat man ko kawa khia wei kawa kyllaiñ bha, wei ktah ko ya kiwa boon kiwa chong chnong neibhah itæ ka sorkar hap syndong ko deiwa chim lang ya i e yumut na waroh kiwa embynta lang hawa pyrchang wow pynbait ya ini.
Heiyatoh wa i pynman yalang paidbah ka VPP wow dawa pynbait biang ya ka aiñ bhah kreh namo ka ‘Reservation Policy”, u Montri Rangbah da ong u wa waroh em ki jar jiar i rukom pyrkhat wei ha ka synchaar paidbah waroh em ki ka hok wow klam yeini.
