Ka mukotduma PIL wa da yaleh da u Philip Khrawbok Shati heiyatoh i khynnai kari ka sor Shillong da chong bichaar ya ka da ka Meghalaya High Court ynnin ka sngi heiwa ka yung bichaar da kdaw ko wa ha kini ki bnai wa dadep ka sorkar da ong ko wa kiwa boon ki manbei manpa da mynjur ki wow phah skur ya ki khon ki deiwa pynemkaam da ki School Bus heiwa ka sorkar u kitkhlieh ko wow pynkrehkaam ya kini ki Bus.
Kamtæ ka sorkar da dep ko wow lai chakhmat yow thied 50-60 tylli ki Bus tangwa ka High Court won da ong ko kopsar ym em leh iyi iyi yow pynkrehkaam ya kini.
Da pynkynmoo leh yeiwa da dep thmu ka sorkar wow leh yow pynkyllooid chipor kamjooh ki kaam wow pykyllooid syndon katkam wa da e buit ka IIM Shillong wa kawi ka seiñ kawa na baar ri kiwa da dep phah thooh bniah ka sorkar tangwa ini leh da ong ka yung bichaar kopsar kut hi-eh kamtu lait noh i mih i thmu wow chna ya ka Ropeway wei kani leh toh neibynta kiwa uiñke suwari.
Kamtæ ka High Court da phah ko ya ka sorkar wow e jubab lyngba ka Affidavit iyi wa da pynkhreh ko wow leh ha kini ki bnai wa ki snem wow wan deiwa pyrkhat yei boon ki kari ki bru samen, ki kari wa poi cha Shillong kamjooh kiwa uiñke suwari ki wym toh thaw de wow booh kari.
Ya kani ka mukotduma daw chong bichaar biang ha ka 03-05-23.
