Ki bor District ka Garo Hills hadien wa ku syndet i chit nadooh ka 17 tarik heiwa ha katai ka sngi ha Resubelpara dapoi 39.1 Degrees Celsius, ha Williamnagar 36.8 Degrees Celsius, ha Tura 37 Degrees Celsius, ha Baghmara 34.1 Degrees Celsius wa ha Ampatai 35.3 Degrees Celsius wei ini i chit da neh i hadooh ynne ka sngi. Ynnin da pynbna wow phah ya ki skur wa em ha East, West, South Garo Hills wow khang ki katwa ha North Garo Hills da phah pynman skur dei step hadooh 12:00 waje i sngi yow yada ya ki khynnah na iwon iwon iwa ye ki u chah ktah na ini i chit.
Ki bor District da pynkynmoo wei da sneiñ ki leh ya ki paidbah yei maa na ini wa joor i chit wa ye u wanrah ya ka Heatstroke, i duna wei raw um i doh i pran, i chah thang ha ka sngi wa kiwi kiwi, kamtæ yow lait na ini da pynkynmoo cha ki paidbah ya ki kyndon wa da pynmih da ka National Disaster Management Authority ka sorkar India kiwa man kamni ha wah:
Kiwa toh u leh
Dih ya ka um chiboon hanla ym em jrah um leh.
Pynemkaam ya ki Sunscreen kiwa khlanbor ym duna ya SPF-15 yow lait u chah thang i sniehdoh.
Sap ya ki sula wa stang, kiwa che rong, kiwa kyllooid, kiwa chna da ki Cotton. Deiñ leh ya ki yitkhmat kiwa yada na ka sngi, pynemkaam da ka chatri, sap ka tupri wa ki juti hawa mih cha lait.
Hawa lai wa wan rah lang wa ka um.
Hawa kreh cha lait, pynemkaam ya ka tupri, ka chatri, tymmoh da ka that wa jhieh na khlieh, rdang, i khmat wa ki kti ki kjat.
Dih ya ki ORS, ki Lassi, Torani (Rice Water), um sohjaaw, Butter Milk wa kiwi kiwi kiwa yarap wow pyndap um hapoh i doh.
Pynemkaam ya ki Fan, ki that wa sngem wei wow sum da ka um wa dait thah.
Pyntikna leh wa i yung i sem toh iwa pynngaad, wai ki khian dwar kiwa ye u wai heipor miet yow lait nei lhep.
Lada sñiaw tlot lane sñiaw kjut, lai wut wut cha ki Doctor.
Ya ki mrad wa ri leh ham ieh u chah sngi ki wei wow e thaw rieh sngi ki deiwa pynbiang um lang ya ki.
Lada em kiwa yoh Heatsroke
Pynthiah ya ki ha i thaw wa dait thah wa pynngaad. Niam yei doh ki da ka thah wa jhieh boonsien. Theh ya ka um dait na khlieh yow pynhiar yei chit i doh.
Pyndih ki da ka ki ORS lane ka um sohjaaw lane kiwi kiwa ye u pyndap yei emkaam um i doh u bru.
Rah ya kini wut-wut cha ki thaw sumaar neibhah ka Heatstroke toh kawa ye u pynyap bru.
Ki kaam wym toh u leh
Ham mih cha lait khamtam heipor 12:00 waje i pyrdi sngi hadooh 3:00 waje i sngi.
Ham leh ya ki jait kreh wa khia wa khor deiwa chah sngi.
Ham dih kiad, dih cha, Coffee, ki Carbonated Soft Drink kiwa pynraw yei doh.
Ham baam doh chiboon, ham baam ya ki baam wa da sah slem.
Ham ieh ya ki khynnah hapoh kari.
