U Montri Rangbah ka Meghalaya, u Conrad K Sangma ynne da lai pait u yei kreh pynchna pyneh wei chna pynmiat ya ka JN Sports Complex, ka Mulitipurpose Indoor Stadium waka First Ground ha Polo.
Ka sorkar da dep ko wow booh bhah ka poisa kawa T. 34.5 klur yow pynchna ya ka JN Sports Stadium Complex ka wym em de pynchna pynheh nadooh wa chna ya ka ha ki snem 1980. Ya ka Indoor Stadium won u pynchna hei lut wa T. 100 klur.
I kreh yong ka madan First Ground, Polo toh kawa da lai chakhmat heiwa da dep wow siang ya u Astro Turf wa thymme wei da yooluti wa ha uni hi u snem u pyndep noh yei kreh yow pynemkaam noh ya kani ka madan wei daw em leh ki thaw chong thymme ya ki paidbah wei daw pait leh ya kiwi ki madan wa em hapoh ki dong, ki chnong wa ka-it ki khon khynroo wow yalehbol wei deiwa ya krehlang wa kiwa pynlai chnong daw chna pynmiat leh ya kini ki madan wei ha Shillong da dep jied 5 tylli ki madan yow booh Astro Turf, da pyntip u Conrad.
U Conrad da pyntip u leh wa ya ka JN Stadium won da pynchna thymme katkam ki kyrdan ka FIFA kamjooh iwa man ya ryngkat wa kiwi ki ri wei heini daw thung da u phlang yong sakhiat wei daw pynheh yow chniam 30,000 ngut ki bru wei daw em ko leh ya waroh ki jait wa emkaam kiwa yalehke.
Daw em leh ki thaw wow leh High Jump, Long Jump, ki thaw phet pyllah wa kiwi de katkam ki kyrdan wa hakhlieh dooh yow ye u pynman ya ki lympung yalehke wow wan chimbynta da kiwa na baar ri.
Heiyatoh won wa ka Multi-Purpose Indoor Stadium kawa em ha madan Polo hi, u Conrad da pyntip u wa kani daw man ko kawa heh dooh hapoh ka North East kawa ye wow pynman ya kiwa boon ki jait yalehke nadooh ka Squash, Badminton, Basketball, Volleyball, Table Tennis wei daw em ko leh ya ka Shooting Range (10M wa 25M) iwa daw pynchlur bha ya ki khynroo khyllood ka jylla.
Kamtæ da ong u wa deilang, kini ki le tylli ki thaw daw pynman ya ka jylla kam ka thaw yalehke wa daw ye u pdiang ya kiwa na baar ri.
