Ka 34th District Level Industrial Exhibition wa pynman da ka yung krehkaam u General Manager, District Commerce & Industrial Centre, Jowai da wan wai ya ka ynne da u Wailadmiki Shylla, MLA ka Jowai kawa da pynman ha Ladthalaboh Indoor Sport Hall, Jowai deiwa emlang u B.S Sohliya, Deputy Commissioner ka West Jaiñtia Hills.
Hawa e yei klam, neiliang u Wailadmiki da pynchlur u ya kitu kiwa seiñ khih, kiwa chna tiar chna tar wow chim kabu ya kani ka rynsan wa da e da ka chnat wei wow pynlut yei bor ha ki kaam wa kreh ki yow ye ki wow pyndap yeiwa emkaam ki. Da e yaroh u leh ya ka chnat kawa da chimkhia wow pynman kam kini ki yaaw yow yarap dai ya ki mar wa da chna da kiwa em hapoh ka District.
Neiliang u DC da yaroh u ya kini kiwa da pynmih ya kini ki mar wa boon jait wei da pynchlur u leh ya ki wow chimbynta ki ha kam kini ki yaaw yow yoh ki leh u yachem lang wei wow yoh buit uwi na uwi.
Neiliang u General Manager ka DCIC, u A. Malngiang hawa e ya ki kyntien pdiang sñiawbha, da pyntip u wa i thmu kani ka Exhibition toh yow pynchlur ya kitu ki khynroo khyllood ki wym pu em kreh yow sdang ki dei yong ki hi i khih, deiwa ong leh wa kini ki jait Exhibition man ko leh ka laad wow tip ki paidbah ya ki jait mar wa da pynmih da ki bru yong i hi kamjooh yow pynoo ki yei sap yong ki.
Ha kani ka Exhibition da em 42 tylli ki dukan wa da booh da kiwa boon ki chnat sorkar kamjooh leh da ki Self Help Group.
