Kam chi bynta u pyntikna yei pynkrehaam ya ka hukum ka NGT hei yatoh wow yada ya ka Wah Myntdu kawa kær talawiar ya ka chnong Jowai, ynne ka sngi ki bor District ka West Jaiñtia Hills wa da mihkhmat da u Additional Deputy Commissioner u MA Challam chirup i emlang ka seiñ Khooid Ya Ka Wah Myntdu, ka Synjuk Waheh Chong Jowai, Synjuk Waheh Chnong Ri Jaiñtia, ka Jaiñtia Fishing and Environment Protection Association, ki bru napoh ka District Council, napoh ka chnat Urban wa Jowai Municipal Board da ya hiar li pait li sylli ki ya ki liar wa da chna kyrpang yow pynkhooid yei tngit wa kai na ki thlu yung ka chnong Jowai chwa wow poi ki ha ka Wah Myntdu.
Ya kani ka liar pynkhooid tngit da tip kam ka Insitu Nallah wa da pynkreh daka chnat Jowai Municipal Board, wei napyrdi 11 tylli wa da mang u chna ha ki bynta waphær waphær ka chnong Jowai, 5 tylli kattæ i kreh da lai ki chakhmat wa kynthup ka liar wa wan na Khimusniang, Mynthong, na Carolyne, Ladthadlaboh West wa ha Panaliar.
U Hunbaitki Passah Asst Engineer Jowai Municipal Board, da khana u wa hapoh kini ki liar daw em ki kamra wa kyrpang hadooh kamwa 7, 8 tylli ki wow pynkhooid nadooh ki plastic, ki moo wei ya ka um leh daw bær dawai hapoh kini ki liar khnang wa khaddooh chwa wow kai ko hapoh ka Wah Myntdu u yoh yei khooid kamwa 80% wei kamwa kattæ 40% i kreh da lai i chakhmat kamtæ yooluti u wow ye pyndep leh pyn ha uni hi u snem.
U KL Pariat u President ka seiñ Khooid Ya Ka Wah Myntdu hawa klam ha kani ka sngi ong u i hiar pait sylli ynne ka sngi toh yow sakhi yei kaam wada leh daka chnat Urban, ka Jowai Municipal Board wa ka District Council hei yatoh wa ka hukum ka NGT.
Kamwa chem ki wa da lai bha i kreh chakhmat wei yooluti u wa kini chnat daw leh ki ya iwa miat tam.
“Kamwa u Chief Secretary ka sorkar Jylla u D.P. Wahlang da dep klam che u wa waroh ki yung wa chna harood ka wah Myntdu hapoh 50 meter toh u tympra noh katkam ka hukum ka NGT, ka aiñ ka JHADC. Da dep kylli yumut i na u sahep ka Urban te pyntip u wa ha uni hi u bnai daw pyndep neibhah da dep phah kot ki cha ki yung wa toh u mih noh ki chwa wow poi i por tympra ya ki” ong u K.L.Pariat.
Neiliang u Rq. Laloo General Secretary Synjuk Waheh Chnong Jowai, yooluti u wa i kaam u lai i chakhmat wei u man leh iwa jop.
Kamtæ kyntu haroh u ya ki paidbah wow sdang i lehkhooid nadooh na yung, yow lait ki tngit u kai cha Wah Myntdu khamtam ki jakhlia paikhana deiwa chna yaki Septic Tank.
Neiliang u Bishar Shylla Secretary Synjuk Waheh Chnong Ri Jaiñtia, da pynrap u hajrong i emkaam wow sumaar wei u yada ya kiwi tawon ki Wah kam ka Wah Myntang, Wah Mynngot wa kiwi.
Wei ymtoh leh u noh khiar yei jhep, ki khyndaw charood ki wah khnang yow neh u sah wei ki bru leh u yoh myntoi ki.
