Hei yatoh wei kam ka Deputy Commissioner ka West Karbi Anglong District ha ka 19 tarik uni u bnai hadien ka yalang ki ar District ha Jowai heiwa da kam ko wa ka chnong Khanduli hap ko hapoh u pood u ang ka West Karbi Anglong District, kamtæ ynne ka sngi neiliang kiwa yahkhmat chnong Khanduli wa kynthup ya u waheh chnong u Yooshida Nongspung, u Assistant waheh chnong u K. Bina, Secretary chnong u Helpme Slong, Chairman chnong u Niwal Challam wa kiwi ki dkhot da beiñ joor ki ya kani ka DC West Karbi Anglong ka Krishna Baruah deiwa ong toh i kam stat donhi ko khlem tip yeiwa sakhiat.
Yow pyntikna yeini da ong ki wa ka chnong Khanduli da jooh pynmih ko keh ya uwa mihkhmat chaka yung dorbar chna aiñ ka JHADC la 3 sien wei chisien cha ka Yung Dorbar Chna-aiñ ka Jylla Meghalaya, uwa wan na ka chnong Khanduli hi u Draison Kharshiïing.
Neitæ ong ki wa i sakhiat katkam wa man hi rap chawah ka chnong Khanduli em sa ka chnong Myni, heiwa ha kani ka chnong leh kiwa boon hi ki bru toh kiwa em dur thap vote cha Meghalaya, yoh ki leh ya ki kaam pynroi wa boon na Meghalaya nadooh ki skur ki thaw sumaar wa kiwi.
Wei chooh chooh da beiñ ki yei booh yung khrong dan ka KAAC hapoh u pood u ang ka Khanduli harood u sarok uwa da mang wei pynkreh daka sorkar Meghalaya hi.
