Ka Hynniewtrep Integrated Territorial Organization, West Jaiñtia Hills District hapoh i yahkhmat u president ka seiñ u Wanbiang Pulang wa kiwa kitkaam ka HITO Khliehtyrshi Area da hiar syndet ki wow kylli bniah hajrong i kyrriah ya kani ka Check Point na Mookyndur cha Khliehtyrchi khlem iwon iwon i pyntip paidbah namo Notification.
Kam wow pynkynmoo heini ka seiñ da booh dorkhat ko nadooh u snem 2021 wow pyrchah joor ya ka JHADC wow wai ya ki ar tylli ki Non Tribal Check Gate kawi ha East Jaiñtia we kawi won ha West Jaiñtia Hills hajrong ka yurim wow kynreh ya ki kot ki sla yong ki baar jylla kiwa wan kit ya kiwon kiwon ki mar napoh u pood u ang ka Ri-loom Jaiñtia.
Iwa phylla won wa toh ka seiñ da chem ko wa ka JHADC e wai pathan ko ya kini ki Check Point cha ki bru samen deiwa chim du ya ka bai wai kawa khian khlem myntoi ka Council hajrong wa Council chem chitom ko ha ka poisa poilaiñ nadooh wa khang ya u mooyong.
Chooh chooh ka seiñ da dawa ko na ka JHADC wow pynche hajrong kini ki Check Point wa i yoh myntoi yong ka lyngba i e wai ya ki cha ki bru samen neibhah da yoh yutip wa ka Council hi u yoh myntoi ko lym deiwa pynlai ko ya kini ki thaw pyn daka hi.
