Ka Rotary Club Jowai kam wa jooh man khlieh ki snem, ha uni u snem leh da pynman ko i pynkup burom ya u Gilford Pde wa yow Tariangmon Lamat neibynta ki kaam wa khroo wa kynsai yong ki kam ki bru kiwa da e sap kyrpang u Blai.
Yeini i pynkup burom da pynman ha ka sngi Thymblein 22 tarik ha Infinity Hall, Mooralong heiwa u Lamphrang Pohktai, Divisional Soil & Water Conservation Officer, West Jaiñtia Hills Jowai Plantation Crops Jowai, Division da man u kam u kongsan hei emlang ka Chartered President Rtn. E.F.Gatphoh (MPHF), Rtn. S.K. Lato (MPHF), Rtn. D.F. Majaw, Charter Member (PHF) wa kiwi ki Rotarian.
U Rtn. Samehi Laloo, President Rotary Club Jowai kam u chongknor yong kani ka yalang da e u ki kyntien yahkhmat neitae pynbood i rwai ya ka National Anthem wei puræ leh ya ka soskular yong ka Rotary da waroh ki Rotarian katwa u Rtn. S.K.Lato (MPHF) e u ki kyntien pdiang burom.
Yei parom wa tbian chaphang ka Rotary Club International kamjooh yei parom chaphang kiwa yoh khusnaam (Awardees) ha kani ka yalang da pynsñiaw da u Reuveny Nongtdu, Director Vocational Service katwa u Rtn. Montri Passah (MPHF) da puræ u yei parom wa tbian u kongsa, u Lamphrang Pohktai.
Chooh chooh da yoh leh i klam e mynsien na ka Chartered President Rtn. E.F.Gatphoh (MPHF) kamjooh leh ki kyntien sñiawngooh ya ka Rotary Club Jowai na u Gilford Pde wa man u nongtahdur wa chyrkhei wa u Tariangmon Lamat waman uwa e dawai yongrim (Traditional Practioner Herbal).
Kajiak chaphang kini ki waheh: U Gilford Pde toh u bru wa emsap heiliang i tahdur ha ki dieñ (Sculpture) uwa na ka dong Chilliangraij, Jowai katwa u Tariangmon Lamat won toh u bru wa e sap u Blai heiliang i rukom sumaar næ dawai yongrim uwa na ka thaaiñ Amlarem.
U Lamphrang Pohktai, Divisional Soil & Water Conservation Officer, West Jaiñtia Hills, Jowai Plantation Crops Jowai, Division hawa klam da e u i sñiawngooh wa khroo ya ka Rotary Club Jowai kawa da chimkhia u leh yei wa bha tam neibynta wow pynkhroo hakhmat ka pyrthai yei sap wa kyrpang yong kini ki waheh wei da pachat u leh ki kyntien kitbok kitrwiang yow nang ye chooh ki u pynjanai yei sap yong ki ha ki dur ki rukom waphær wei khaddooh ya kani ka yalang da pynkut da ki kyntien sñiawngooh na u Rtn. Deibormi Toi, President Elect Rotary Club Jowai.
