Ka Jaiñtia Student Movement – Western Region ha ka 22 tarik da pynskem ko ya kiwa kitkaam neibynta ka samoi krehkaam wa 2023-2026 heiwa da yahkhmat wow e ya ki kyntien kular da u Working President, Central Body u Jimmy Raul Kharmuti, wei da yoh i klam pdiang burom na ka Syllimon Challam, Publicity Secretary ka WR ryngkat i emlang u President Rangbah, u Leningstar Rymbai wa u General Secretary, Roitre Dkhar, Chief Organising Secretary u Pillarstone Phawa wa kiwi kiwi.
Ya ka yalang da pynphooh da u Senior Advisor u Terence Sawian wa u Legal Advisor ka Western Region u Fivestar Suiam. Da yoh leh i klam na u Working President u Wanpoi Lyngdoh.
Da yoh leh i klam na u Leningstar Rymbai uwa da ong wa khana tbian ya i lai luti ka seiñ hanla em i eh i khor wa i kyrkhu, heiwa nadooh u snem 2016 ka seiñ da e dorkhat we da dawa ko na ka Sorkar ya ka Government College ha East Jaiñtia Hills District wei wow pynku kyrdan ya ka Kiang Nangbah College.
Da ong u wa kiwa yahkhmat toh u man ki bru wa em yurim, kiwa stat wei chemphang heiwow chakri wow yaleh neibynta i yap i im ka jaitbru kamjooh leh neibynta ka mynried yong ka.
U Roitre Dkhar da kyrkhu kyrdoh wei kitbok kitrwiang u ya kiwa kitkaam ka seiñ JSM-WR wei da pynkup burom u leh ya kiwa krehkaam wa thymme ka seiñ neibynta kani ka samoi wow wan.
Neiliang won u President ka WR u N. Ribok Biam hawa e yei klam da ban joor u heiyatoh wow em i sñiawthooh yumut lang para wa kitkaam wei ki chipai ka yung ka sem khnang wow pynim ya ka jaitbru.
Da ong u leh yei chem chitom ki paradoh ha thaaiñ khappood wei da kular u leh wow chimkhia hajrong ini i bynta wa ktah ya ka jaitbru.
Da yoh leh i kyntien khublei na u Vice President ka WR u Pynjur Suchiang wei da yahkhmat wow kbai ya ka kyntien imsngi namo ka Moto ka seiñ da u General Secretary u Shanskhem Suchiang.
