Kam chibynta wow pynchlur ya ki khynnah wa dang lai præ puthi ha ki thaaiñ palatsor, neiliang ka Farm Connect Development Society da yoh ko wow e sñiawbha da ka Desktop Computer, ka Printer, ki kot thoh, ki khulom wa kiwi kiwi de iwa emkaam cha ki khynnah skur yong ka St. Eugene English School, Lad Lakadong, East Jaiñtia Hills District.
Ya kini ki tiar ki tar da e sñiawbha da ka Cozicars Shillong kawa man kam ka Car Detailing Studio kawa em ha Mawiong, Shillong heiwa da e kti ya ki ha u Principal kani ka skur wa kiwa sikai skur deiwa emlang leh ki khynnah skur.
Kani ka skur toh kawa em cha kdong bha wei u sarok leh toh uwa sih bha yow poi cha katai ka skur. Ki khynnah wa em ha kani ka skur toh kiwa wan na ki manyung wa dooh wa duk wei em leh ki khynnah khonswet.
Ka Farm Connect Development Society toh kawa da yoh yei tipmit na ka Ministry of Corporate Affairs ka ri India yow pynkrehkaam ya ki kaam Corporate Social Responsibility (CSR) yong ki Company wa ki karkhana kiwa e yarap cha ka imlang sahlang wei kam ka Society won toh kawa kreh monsñiawbha yow yarap ya ki warep wa kiwa dooh wa duk ha ki thaaiñ palatsor.
Ka Society da kyrpaad ko leh ya kiwi wow e yarap ki cha ki skur wa em cha palatsor kiwa emkaam sakhiat yei yarap yow kyntu yei puræ puthi yong ki khynnah wa ki skur waphær waphær.
