I dawa wow kyrriah ya ki bru na Them Metor hadooh katni ympu poi cha ka thong wot hadien wa da mih awri wa joor ha u snem 2018, wei wot hadien wa ka sorkar da thung ko ya ka High Level Committee kawa dadep ekti leh ya ka bui hajrong ini i kaam.
Uni u muktiar ka jylla, u VGK Kynta da ban biang u ya iwa da klam u ha u snem dadep, wei da ong u wa toh u ujor lyngba ka ‘Civil Suit’ kamwa da phah da ka Meghalaya High Court ha u snem 2019, kawa ye wow pynkut noh ya ini i eh i khor wei lada ka sorkar kwah noh ko ya i thaw ha Them Metor, toh u lai katkam ka luti aiñ.
Da ong u wa ki paidbah toh u tip ki, chisien wa da kwah wow beh noh ya ki, da man ki bru kiwa chong chnong da tip kam kiwa da chong yabor wei wow beh leh katkam ka aiñ.
Da ong u wa katni da tipmit kiyi kiwa toh hok kiwa chong chnong wei kiyi kiwa chong yabor pyrchah aiñ wei man iwa eh wow tip ya ki, da pynrap u wa yoo u wa ka sorkar hi man ko kawa tlot, wei iwa bha dooh toh wow ujor da ka Civil Suit wow pynmih ya ki bru na itai ki thaw.
