Kam chibynta wow lehburom ya kiwa khih mylla ha waroh ka pyrthai wa i chakri yong ki kawa da tip kam ka International Labour Day da pynman ya ka yalang ha Raj Bhavan, Shillong hajrong ka thong “Health and safety at Work” namo i chngaaiñ ha ki thaw kreh.
Neiliang u Lat ka jylla u Phagu Chauhan da ong u wa i pynman kam kani ka yalang wow lehburom da pynman da ka chnat Labour Department ka sorkar jylla toh iwa miat bha.
Hawa e yei klam ha kani ka sngi u Phagu Chauhan da yaroh u ya ka chnat kawa da kheiñkor ya kiwa khih mylla deiwa bood ya ki kyndon ka aiñ wei ka sorkar pyrdi da pynkylla ko ya ka kyndon 26 Labour Law ha ki soo bynta iwa kynthup ya ka Code of Wages, Industrial Relations’ Code, Social Security Code wa Occupational Safety, Health and Working Conditions Code, deiwa pynsuk ya kiwa khih mylla ka jylla.
Ka sorkar pyrdi da ong ko wa ka sorkar Meghalaya man ko kawi na ki jylla kiwa da pyndap pyrtuid ha ki kyrdan Unorganized Workers hapoh ka e-labour wei da pyntikna wa yoh myntoi ki na kani ka scheme heiwa da em palat 2 lak ngut kiwa da pyndap ha ka E-Shram.
U Commissioner and Secretary, Labour Department, u Dr. BDR Tiwari da batai u hajrong kani ka sngi wa tip kam ka International Labour Day.
Kiwi kiwa da klam ha kani ka sngi kynthup ki ya ka Sr. Delina Lyngdoh, MSMHC wa man kam ka State Programme Coordinator on National Domestic Workers Movement, Meghalaya Region; u Richard Thabah, Secretary ka AITUC Meghalaya State Council wa u Khroo Lamsalangki Pariat uwa da chah pynkup burom hadien wa sdang u ya ki seiñ waphær waphær ha Ri-loom Jaiñtia, wa kiwi kiwi.
