Neidaw i artatien ki paidbah wa klam chawah chaneiñ cha yaaw cha haat wa ka um baam um dih wada mang yaka sor Jowai lyngba ka Wah Mynngot na Sohmynting kawa da tip kam ka Renovation of Jowai Water Supply Scheme ym pu em poi ko cha Jowai wot hadien wada wai yaka nadooh u Wisu 2022, kamtæ ynne ka sngi ka seiñ Khooid Yaka Wah Myntdu hapoh i yahkhmat u K.L. Pariat kam u President ka seiñ, wa u Bichar Shylla, Secretary Synjuk Waheh Chnong Ri-loom Jaiñtia chirup i emlang u SDO (PHE Electrical Sub Division) Jowai, u Roskil Challam wa kiwi da hiar pait sylli ki cha ka wah Mynngot ka thaw wa taan ya kani ka um ha chnong Sohmynting.
Neiliang u Roskil Challam da khana u wa nadooh wa wai ya kani ka Scheme saam um haka 27 tarik Naisan 2022, ka um da man kawa lai bait hadooh ynne ka sngi. Heipor wa sdang da Pump um 6 kynta chisngi na Wah Mynngot tangwa kat dang lai ki por won hadooh kamwa man katni da ye u Pump um 12 hadooh 14 kynta chi sngi katwa na Wah Mynngot, katwa na Myntdu won da Pump du kamwa 3-4 kynta donhi chi sngi.
Neitæ i rukom saam um ha Jowai katni da ong u da rap pahooh ka um ymtoh de kam heipor wa chaniah du na ka Wah Myntdu, lait noh hawa pynthut ka bordiñ kawi na ki daw wa dang duna um ki top pynlang um neibynta ki dong ha sor Jowai.
U KL Pariat uwa man u President ka Khooid Yaka Wah Myntdu hawa klam da ong u, ini i hiar li pait yong ki toh yow pyntikna wa ka um baam da poi sakhiat hi ko mo cha Jowai, heijooh i por leh kam chi bynta u booddien khnang yow yoh yaka um wa khooid wa jngiar, heiwa ha kini ki sngi neiliang yong ki da dep lai pait ki yaka Wah Myntdu wa ya ki top um wei da phah pynkhooid leh ya ki.
Sñiawkmen ki leh wow poi cha kani ka thaw heipor wa biang tam neibhah wa yoh ki u sakhi yei Pump um na kani ka wah wei ka um leh da mih da lai khlan ko.
Kamtæ da pynsnñiaw haroh wym kwah ki ya ka Wah Mynngot u man ko kam ka Myntdu kawa da chah ktah katni nei leh ki bru hi deiwa pynkai jakhlia, noh jhep noh khyndaw.
Heiyatoh waka Dam kawa da chah pynjæd nei khlan ka um, da kyntu u yaka chnat PHE wa toh u chna deiwa miat khnang yow lait nei saja um hadien, lada jia chah rah um sa ka bynta wa dang dep chah Dam da ki khyndaw wa thap hapoh churia wa ki moo.
Da kyntu haroh u yaki chnong wa em harood ka Mynngot, kamjooh ki kharkhana tylliat moo wa pynkai yei lakhit cha kani ka wah, neitæ kiwa tih moo tih chyiap leh wow yakrehlang ki deiwa pyrkhat ya kiwi kiwa pynemkaam ya kani ka wah.
Neiliang u Bichar Shylla da kyntu u ya ka sorkar wow chna pynmiat ya u sarok wow poi cha kani ka thaw, neitæ ki pchem ki soodong sookun ki yung krehkaam leh dang boon kiwa sahteiñ.
Da kyntu u ya ka Synjuk Waheh Chnong Jowai wow sñiawbha ki u thooh thaw chna top um ha man ki dong ki chnat yow lait nei duna i yoh um ki paidbah, neibhah wa kat dang mih ki por ki thlu yung dang boon ki bru wei lada ka sorkar ym yoh thaw ko, daw man iwa eh u pynhun yei angnood u paaid wa chnong chnong.
