U Montri sorkar warim uwa da thung katni kam u Chairman ka Meghalaya Industrial Development Corporation (MIDC), u James P.K. Sangma da khut u ya ki karkhana wa em ha Meghalaya wow seiñ da ka Joint Consultative Industry Forum (JCIF) hapoh ka jylla kam chibynta wow pynkhlan yei thmu ka sorkar jylla wow pynku yei khayi pateiñ.
U James da ong u wa kani ka JCIF daw yarap kow wow tip kiwon ki jait karkhana namo ki jait khih kiwa toh u pynbha pynmiat deiwa ya krehlang waroh kiwa embyntalang yow ye u pynmankaam ya waroh iwa ka jylla Meghalaya em ko yow poi cha ka thong ha ka khayi pateiñ.
“Ha i yachem O wa kiwa boon ki seiñ yong ki karkhana kam ka Confederation of Indian Industry (CII) waka Federation of Indian Chambers of Commerce and Industry (FICCI) ha New Delhi, da yaklam i yow pynku ya ki kaam seiñ karkhana ha Meghalaya yow poi cha ka thong wow pynman ya ka Meghalaya kam ka $10 Billion Economy kat ha u 2028,” da ong u James.
“Kam wow sdang, emkaam wow em kawi ka rynsan neibynta waroh ki karkhana deilang waka sorkar yow thooh ki laad ki luti deiwa ya krehlang. Kam ka kaap wa nyngkong ha kani ka luti wow pynku yei yoh i kot ka jylla, emkaam i wow emlang ha ka jooh ka sla yow poi cha kani ka thong,” da ong chooh chooh u.
Da ban joor u yei emkaam ya kani ka Forum kawa daw em i bynta wa emkaam bha yow pynu yei yoh i kot ka jylla namo ka Gross State Domestic Product (GSDP), iwa daw wai kiwa boon ki laad khayi wa kamjooh leh i yoh kreh.
Ha ka 4 tarik uni u bnai, u James da dep thoh u leh cha u Montri Rangbah ka jylla, u Conrad K Sangma yow kyrpaad ya oo wow khlieh ya kani ka Forum heiwa ka MIDC u man ko kam ka chnat wow pynkrehkaam ka.
