Ha ka thong yong ka World No Tobacco Day 2023 ka wow man ha ka 31 tarik uni u bnai, mih sarok ki khynnah skur wow ya chimbynta ha ka No Tobacco Day Rally wa ka Signature Campaign hajrong ka phang wa ong: “My Meghalaya, Tobacco Free Meghalaya”.
Ini i mih sarok ki khynnah skur ha kylleiñ ki chnong ki thaw yong ka jylla da man i katkam ka hukum yong ki bor wa hakhlieh ka chnat puræ puthi yong ka sorkar ya waroh ki skur nadooh ki Lower Primary, Upper Primary, Secondary wa ki Higher Secondary.
Ha West Jaiñtia Hills District ha kani ka tayaaw da sakhi da yoo yei mih sarok ki khynnah skur ha kylleiñ ki Block yong ka District deiwa e wyrta chula cha ki paidbah wa chong chnong hajrong i sih wa mih nei pynemkam ya u sikret, biri wa u duma.
Kani man ko leh hei dur ka yakob hapyrdi ki skur kawa kynthup nadooh na Block Level, District Level wa ka State Level wei ka tarik wa khaddooh yong kani ka yakob u kut ko hadooh ka 19 tarik uni u bnai.
