Uwa yahkhmat ka TMC ha Meghalaya, u Dr. Mukul Sangma da ong u wa i mih khubor wa daw lai u cha ka BJP toh du i mutdur katkam wa da mih ha ki laad pathai khubor, wei da kyntait u wa em iwon iwon kam ini i thmu.
Hawa yaklam ynne ka sngi wa kiwa thoh khubor, u Dr. Mukul da ong u wa ka khubor toh kawa bakla wei kawa mutdur hi-eh da ki laad pathai khubor, tangwa ym ye wow pynsangeh yeitæ neidaw wa toh i kaamram kiwa thoh khubor.
Heijooh i por da ong u wa ym du kiwi ki seiñ saaiñ pyrthai kiwa kwah wow pynsiah ya ki MLA tangwa ka TMC da khut ko leh ya kiwi ki MLA wow wan psiah noh cha ka TMC neibynta wow chakri ya ki paidbah ka jylla.
Hawa yatoh yei wym ye wow chna sorkar khlem da em ka NPP, u Dr. Mukul da ong u wa hei yong sakhiat da em i pyrchang na ki seiñ saaiñ pyrthai wow chna sorkar khlem ka NPP tangwa neidaw wa em ki MLA na kiwi ki seiñ saaiñ pyrthai kiwa chah thied, da sepai noh i thmu. “I wiar ki MLA pynyoo wa em boon ka ya thong ya thied, wei i leh wym hok yong kitu kiwa kwah wow thooh laad yabor daw pteiñ i yow em ki ha i bor”, da ong uwa yahkhmat ka TMC.
Da kam u leh wa daw em kiwa daw jia ha kini ki sngi wow wan yow pyrchah ya kani ka sorkar. “Ha kini ki sngi wow wan, pait won wa da em iyi iyi wow jia, man hi-eh kiwa yai chah”, da ong u.
