Ka khyllood Rupda Lato kawa em 22 snem i rta kawa chong wa sah ha Panaliar Jowai, kam kawa da chah jied u mihkhmat yaka ri India hei yakob miat kynthai wa tip kam ka Miss Aura International kawa daw man ha uni u snem ha Antalya, Turkey ynne ka sngi hawa paan kyrchaan ko na ki paidbah, da ong ko, “I kyrchaan wym toh ware yaka poisa, tangwa du da ki kyntien wow ong phi wa sñiaw sarong phi ya nga, wa ki kyntien e mynsien pyn-ehbok pyn-ehnasib yong phi da biang ware ki wei da pynkmen ki yow nood O, yow nang ye chooh chooh u lai chakhmat wei wow mihkhmat leh yaka ri dei sñiaw sarong wei sñiaw burom.”
Ya kini ki kyntien da klam ko ynne ka sngi haka yalang pynkup burom yaka da ka Haven’s Cove Nature and Environment Protection Society deiwa emlang u Wanphrang Gassah, In-Charge Librarian Jowai kam u kongsan, u Dr. Evarist Myrsing kam u symbood kongsan najrong ki bru waheh, kiwa ha-yung ha-sem kani ka khyllood wa kiwa chah khut sñiawbha.
Neitæ hawa khana ko yei lai luti, da pynsñiaw ko leh i sarong wow yoh ka laad wow lai chimbynta ha katai ka rynsan yakob miat kynthai wa heh tam ha Turkey, deiwa e yaroh nyngkong dooh ya u Blai uwa ka da chaniah ko hei lai luti yong ka.
Wei kamwa u Blai da bhah u jar jiar ki bynta ya u bru da jar jiar ki sap waphær waphær, kamtæ sñiawngooh haroh ko yaka yung ka sem nadooh ka bei u pa ko kiwa da pdiang wei kyrchaan yei angnood wa em ha ka.
U Dr. Evarist Myrsing hawa klam kam u symbood kongsan da kyntu u ya kani ka khyllood wow man ko kawa yieñ skem wei chaniah ha idæ najrong wow lai chakhmat heiyatoh iwon iwon i angnood yong ka deiwa ap yei sneiñ ka bei u pa.
Da pynrap u leh deiwa ong, “I im u bru toh i e yong u Blai iwa wan du chisien, neitæ i daw emkaam u im deiwa pyrkhatbha neibynta u wanrah naam rah burom yaka yung ka sem, ka jylla wa ka ri”.
U Wanphrang Gassah kam u kongsan won da pyn-ehdaw u ya kani ka khyllood wei yooluti u leh wow liwan ko na katai ka ri deilang i rah naam yaka jylla wa ka ri India.
Heijoooh i por sñiaw sarong haroh u wa kani ka khyllood wym du wa wanrah ko yei naam i burom tangwa i lai luti yong ka da man leh ka nongmuna ya kiwi won ki khon khynroo khyllood.
Yei pynkup burom neibynta ka Rupda Lato da pyndep da u President ka Haven’s Cove Nature and Environment Protection Society, u Bari Laloo, wei neiliang kiwa yahkhmat ka Kyrmen Foundation leh da chim ki ka bynta u e burom yaka haka yalang wa pynlai daka Simi Khongthiang wei da emlang leh u Songashim Rungsung uwa jop ya ka Rubaru Mr. India.
