Ka seiñ KSU Malki Circle deiwa ya krehlang waka chnat Forest & Environment Department Malki Beat Office da pynbna paidbah wa da khang noh chi syndon yei psiah i mih yong ki bru cha kani ka khloo Malki khlem da yoh bor kawa haap hapoh ka Laitkor Protected Forest Area katkam ki kyndon aiñ yong kani ka chnat sorkar.
Ki daw wa da pynman ya ka KSU Malki Circle wow phah khang noh yei psiah i mih yong ki bru chapoh khoo Malki toh yow pynneh pynsah ya ki tyllong umdih, wow pynneh pynsah yei rben ki khloo wa kiwi de deilang wow pyndooh ya ki kaam khlemakor wa da leh da ki bru kiwa wan ke cha kani ka khloo.
Kani ka khloo toh kawa pynbiang umbaam umdih ya ki hajar tylli ki manyung hapoh Malki wei da e um ko leh ya ki skur wa em hapoh chnong wa ya kawi ka Hospital kawa em hapoh ka chnong hadooh ki yung krehkaam sorkar kiwa em ha Lachumiere leh chaniah um ki na kiwa mih na kani ka khloo.
Kamtæ da ong wa lada ym khang katni yei lai i wan katwa ngait, ha kawi ka sngi daw stang i khloo wei ym ye de wow pynmih um kamwa katni. Sa iwi leh wa em ki bru wa leh pynsih ya ki tyllong um kamjooh leh ki Pipe um kiwa em hapoh khloo.
Sa iwi leh toh i thmu wow pynneh pynsah ya ki dieñ bilat kiwa da em la kamwa 170 snem tam katkam i batai yong ki sahep wa kreh ha chnat Forest.
Ka seiñ da pyntip ko wa nadooh u snem 2021 da yoh ko wow kem ya kamwa 20 ngut kiwa wan dih drugs hapoh kani ka khloo wei ha ka chi sngi da em da ki spah ngut kiwa wan chong dih kiad hadooh wym man chngaaiñ de ya ka chnong wa em kini ki bru wa muaid.
Ka KSU Malki Circle da e khublei ko leh ya ki sahep ka chnat Forests & Environment khamtam ya ki sahep wa ki Forest Guard yong ka Malki Beat Forest.
