U Montri Rangbah ka jylla, u Conrad K Sangma ynne da chimbynta u ha i lehkmen dap 100 snem ka Jaiaw Presbyterian Higher Secondary School, Shillong hei emlang u Chairman ka Meghalaya State Planning Board, u Metbah Lyngdoh.
Hawa e yei klam, u Conrad da e khublei u ya kiwa pynlai ya kani ka skur heiwa ki 100 snem pynyoo ko yei chakri khamtam ya ki khynnah kiwa wan na ki manyung wa duna hei yoh i laa.
U Conrad da ong u wa kani ka sngi man ko kawa sahkynmoo hajrong ki kaam wada leh kani ka skur ha ki snem wa da lai wei emkaam leh wow pyrkhat kammon u lai chaphrang deiwa booh ya ki thong ki wow myntoi ki khynnah.
Heiyatoh wa i eh i khor wa chem ha i puræ puthi, u Conrad da ong u wa emkaam wow chim ya ki rai ki wow pynbait ya iwa eh wa khor khnang wow myntoi ki khynnah ha i puræ puthi.
Hawa e yei klam u Conrad da ong u wa ka Meghalaya em ko kamwa 14,000 tylli ki skur wei 55,000 ngut kiwa sikai iwa man rap boon lada nujor wa kiwi ki jylla wa khian ha ka thaaiñ mihsngi. Da ong u leh wa ka sorkar pynlut ko palat T. 2200 klur chi snem kam i yarap cha ki skur waphær waphær lyngba ki Grant.
Da ong u leh wa hanla pynlut chiboon ha i puræ puthi, ka jylla emkaam u kreh chitom ko wow yaryngkat wa kiwi ki jylla ka ri.
U Conrad da pyntip u leh wa ka jylla daw chna ko ya ka Education Commission ka wow pait ya ki laad wow pynmiat ya i rukom e sikai hapoh ka jylla.
Ha kani ka sngi da pynbna u leh ka song poisa wa T. 20 lak na ka Chief Minister’s Special Development Fund wow pynheh ya kani ka yung skur.
