Ka jylla Meghalaya toh kawi na ki jylla hapoh ri India wa boon dooh ki bru wa bang wa ka-it u pynemkaam ya ki jait dih wa chna na u duma wei katkam i khana ki bru wa thooh bniah da ong leh wa da man ko ka jylla wa boon dooh ki bru wa yoh kjut neidaw yong u sikret, u duma kamtæ ka Meghalaya Tobacco Control Cell deilang waka Sambandh Foundation chirup ka chnat krehkaam yong i puræ puthi ha ka thong yong ka World No Tobacco Day 2023 da khut pynman ki ya ka lai paidbah wa tip kam ka Rally Against Tobacco deilang ka Signature Campaign hajrong ka phang wa ong, “My Meghalaya, Tobacco Free Meghalaya”.
Kani ka Rally Against Tobacco deilang ka Signature Campaign toh kawa da pynman kyrpang ya ki skur nadooh ki Lower Primary, Upper Primary, Secondary hadooh Higher Secondary wei da sdang ya ka nadooh u Naitung 2023 wei u kut won ha ka 19 tarik Naisan 2023.
Ha West Jaiñtia Hills District kani ka thong daman ko kawa yoochongchit heiwa ki khynnah skur haman ki Block deiwi i sur da mih sarok ki khynnah skur wow e wyrta chula cha ki paidbah deilang i rah ya ki kot rben wa thoh ya ki kyntien maham hajrong i sih yong u duma, sikret, biri wei hei lai yong ki tymbud sarok da khut kyrpaad ki ya ki paidbah wow yakrehlang neibynta i burom ka jylla ka District waroh kawi.
Chooh chooh iwa yoosuk leh u sakhi wa ha kani ka Rally Against Tobacco, ki khynnah da mih sarok ki wow ya chimbynta deiwa kup wei sap dei riam i bait yong ki jaitbru u Ynñiawtrep wa i yong ki A’chik iwa pynyoo ka dak i sñiawsarong yei man kyrpang ka jaitbru kamjooh ka jylla waroh kawi.
Kani ka Rally da man ko leh hei dur ka yakob hapyrdi ki skur kawa kynthup nadooh na Block Level, District Level wa ka State Level heiwa ki skur wa yachimbynta hap ki u pyndep ya ki sarin kani ka yakob deiwa Upload ya ki dur ha ka Link wa dadep phah cha waroh ki skur.
