Ka Reserve Bank of India (RBI) da pynbna ko wa ya ka kot poisa T. 2000 kawa da pynmih ha u Khonchonglad (Nov) 2016 yow pyndap yeiwa emkaam poisa hadien wa pyndam ya ka kot poisa wa T. 500 wa T. 1000 warim kat wym pu ye u pynmih da kiwa thymme wei ya kini ki kot poisa wa T. 2000 ym em de chon nadooh u 2018-19.
Da pyntip leh wa kamwa 89% kini ki kot poisa T. 2000 da pynmih chwa u Wisu (Mar) 2017 wei dapoi ki kattu cha wakut i por ki iwa da booh 4-5 snem donhi wei kini ki poisa kiwa dang em katni ha kti ki bru wa cha ki yaaw ki haat da hiar na T. 6.73 lak klur heipor wa boon dooh ki ha ka 31-03-18 wei hadooh katni won da em ki T. 3.62 lak klur.
Ka RBI da pyntip ko leh wa kani ka kot poisa toh kawa duna bha i pynemkaam ki bru tangwa dang dap hi i em ko yeiwa emkaam ki bru.
Kam chibynta ka thong “Clean Note Policy” ka RBI da rai ko wow pyndam noh u pynlait ya kini ki kot poisa wa T. 2000 tangwa u man hi ki kiwa dang krehkaam deiwa ong leh wa ini ymtoh i sien wa nyngkong wa leh kamni wei da leh yeini ha u snem 2013-14.
Kamtæ ki bru paidbah ye ki wow lai thap ya kini ki kot T. 2000 cha ki Bank Account lane kylliang ki ha ki Bank yong ki. I lai thap ya kani ka poisa ym em kyndon deiwa thymme wei ye u leh kamwa jooh thap poisa hi khlem da khang.
Yow lait won u pynthut yei krehkaam ki Bank, u chah u kylliang du T. 20,000 kini ki kot T. 2000 chisien kylliang ha kiwon kiwon ki bank nadooh ka 23-05-23 hadooh ka 30-09-23.
Ka RBI da phah ko leh ya ki Bank wym toh de u e poisa ki da ki T. 2000 nadooh myntu.
