Ka yung krehkaam u SP ka West Jaiñtia Hills ynnin ka sngi da pynman ko ya ka yachemlang yong waroh ki Village Defence Party (VDP) wa em hapoh ka District kawa da pynman ha Chutwakhu Indoor Sports Hall, Jowai.
Da ya wan wow chimbynta da u DC ka District, u B.S. Sohliya kam u kongsan deiwa emlang u C. Syrti, SP, u V.D.S. Rymbai, ASP wa u GAL Marshillong MPS, SDPO Amlarem uwa da pynlai leh ya ka yalang.
Da em leh ki Circle Officer ki VDP, ki OC ki Police Station, Ki IC ki Police Outpost wa ki Beat House wa kiwa mihkhmat ya ki VDP wa em hapoh ka District.
Waroh da em kamwa 400 ngut kiwa da wan wow chimbynta heiwa da yoh ki yei pynche hajrong i kaamram ki VDP, i bor yong ki kamjooh i rukom krehkaam ki deiwa bood ya ki kyndon ka aiñ heiwa da ban joor wa toh u leh du katkam i bor wa da pynkup ha ki.
Da yoh leh yei ya phyllu yumut heiwa ki dkhot ki VDP da e laad ya ki wow kylli ki ya iwon iwon i wym sñiawthooh ki yow yoh ki yei pynche.
