Ha ki yaleh ka Meghalaya State League 2023 da yoh i jop ya ka Mawlai waka Ladthadlaboh ha ki yalehke wa da pynman ha Shillong wa Jowai ynne ka sngi.
Ha kiwi won ki yalehke, ka Khliehmawlieh Youth Club da jop ko da 1-0 ya ka Chipakkore ha Tura, katwa ka Pyndengrei da rem ko ha ka Lumdiengngan ha Mawkyrwat da 1-0.
Ha Shillong ka Mawlai da yachem ko waka Langsning kawa man leh ka Group A deiwa jop ka Mawlai da 2-1.
U Banteilang Lyngdoh da thap u ha ka minit wa 39 ya ka Langsning kawa da neh hadooh wa kut ka kylla step tangwa ha ka kylla miet da su kylliang u Donlad Diengdoh ha ka minit wa 63 wei da pynjop da u Robert Khongriah uwa da thap ha ka minit wa 77 iwa mut wa ka Mawlai kattu da yoh ko 6 Point yow yoh nyngkong ha kani ka Group.
Ha Jowai won, ka Rymbai Iawpynsing da pyntam ko arsien pyrchah ya ka Ladthadlaboh tangwa pyn arsien da ye ko wow su kylliang hadooh wa jop da 3-2 ha ka Group B.
Ka Rymbai da yoh ko da ka Penalty du hapoh 2 minit kawa da thap da u Heismiki Rymbai (2’), ka Ladthadlaboh leh da yoh Penalty ko hadien wa da tba uwa yalehke ka Rymbai ya ka bol chwa wow chim u ya ka Free Kick iwa da pynkulmar ya kiwa yalehke heiwa uwa chah e Hand Ball da ong u wa da pynsangeh u ya ka bol chwa wow chut u ya ka Free Kick tangwa ka rai u Referee da neh ko wei da thap da u Teibokmi Lyngdoh ha ka minit wa 27 neibynta ka Ladthadlaboh. Hadien ini da em sa 3 tylli ki Penalty ki wym em wa yoh u thap.
Kamtæ ki kool wa sah da thap chwa u kut ka yalehke hei wa u Heismiki da thap biang u ha ka minit wa 79 tangwa ka Ladthadlaboh da su ko pyn ha ka minit wa 88 lyngba u Thinkwell Bareh yow pynman ya ka yalehke da 2-2.
Ka yalehke da yoo kamwa daw kut ko khlem em wajop tangwa ha ka minit wa 90+3, u Phrangsngi Pakem da pynjop u ya ka Ladthadlaboh.
Da ini i jop, ka Ladthadlaboh waka Rangdajied United da em ki mar 7 Point tangwa da tam ka Rangdajied neidaw wa boon ki kool wa thap ko kiwa 8 tylli katwa ka Ladthadlaboh won 6 tylli.
Ki yalehke ha ka 22 tarik man ki kamni ha wah:
Group A, Shillong – Seng Samla Laitryngew Vs Jyntru, 3:00 PM
Group B, Jowai – Niaw Wasa United Vs Youth Club Pdengkarong, 2:30 PM
Group C, Mawkyrwat- Riangdo YSCA Vs Mawten, 3:00 PM
Group D, Tura – Wa’sa FC Vs Warima Youth Club, 3:00 PM
