Ki bor pait bor pynlai ka Meghalaya Bharat Scouts & Guides West Jaiñtia Hills ynnin ka sngi Pynsiñ 19 tarik da pynman ko ya ka Rajya Puraskar Testing Camp ha District Headquarter, Jowai.
Ha kani ka Testing Camp, ki khynnah Scouts na ki Unit waphær ka District kiwa da yoh laad u pyndep ya kani ka Rajya Puraskar Test da wan ki wow ya chimbynta iwa man hei pait i yoo ki Scouts Master wa ki Guides Captain yong ka Meghalaya Bharat Scouts and Guides.
Katkam ka rukom dustur ka Scouts-Guides Movement, kani ka Testing Camp mut ko kyrpang ya kitu ki khynnah Scouts-Guides ki wow yaleh ya ka Rajya Puraskar Award kawa tip leh kam ka Governor’s Award kawa man ka Award wow e cha ki khynnah lyngba u Governor ha man ki jylla yong ka ri India.
Chooh chooh ha kani ka Testing Camp ki khynnah hap ki u pynkhreh ya ki Log Book kiwa man kyrpang nadooh ka Pravesh, Pratham, Dwitiya wa ka Tritiya Sopan Badge heiwa najrong ki Log Book emkaam won leh wow pynyoo ki yei tip yong ki ha ka Testing Camp heiwa ki Scouts Master wa ki Guides Captain u chim ki u pait u sylli bniah ya iwi pa iwi i bynta wa yatoh waka Scouts-Guides Movement chwa wow e ki ka muhor wow man kiwa yoh ya ka Rajya Puraskar Award 2023.
