Ka sorkar Meghalaya lyngba ka chnat Mining & Geology da pynbna paidbah ko khamtam cha kitu ki tre mooyong hapoh ka jylla kiwa da dep chah chim yukheiñ ya u mooyong yong ki sa chisien deiwa leh da ka Drone Survey, i wan da ki bru lane deiwa leh da waroh ar ha u snem 2022-23.
I mooyong hadien wa da dep chim yukheiñ ha waroh kawi ka jylla da chem wa em u 14,10,710.41 MT wei na uni da em 5,95,323.775 MT uwa da dep dai lilam lyngba ka Coal India Limited (CIL) wei kattu u sdang noh wow kit ya uni u mooyong na ki diphu wei u mooyong wa dang sah uwa 8,15,386.635 MT daw dai lilam katkam i por wa da booh.
Heiyatoh wa ini, da phah ya kitu ki tre mooyong kiwa da dep chah chim yukheiñ biang u mooyong kamwa da kdaw haneiñ tangwa ym pu em dep dai lilam wa hap ki wow leh ya ini ha wah:
Waroh ki tre mooyong kiwa em u mooyong hapoh ki thaw wa da dep chim yukheiñ toh u lai yaleh ki ya ka Transit Pass (TP) chisyndon na jar jiar ki DC yow ye ki wow kit ya u mooyong nei thaw wa tih yow lai pynhaap cha i thaw wa da dep pynbait da ka CIL ki wow man kam ki diphu.
Lada em u mooyong u wym pu em da dep chim yukheiñ lane ym em u ha ki thaw wa da dep chim yukheiñ, daw chah kem noh u wei daw pynchitom ya ki tre katkam ka aiñ MMDR Act, 1957.
Lada chem leh wa u mooyong duna u ya iwa da dep chim yukheiñ, daw pynchitom ya ki tre katkam ka aiñ MMDR Act, 1957.
Hadien wa dep dai lilam katkam wa da booh por ya uni u mooyong wa 14,10,710.41 MT, u mooyong wa dang sah lada chem wa em cha ki thaw kiwa palat ya iwa da booh da pynbait, daw chah kem noh u ha ka sorkar wei daw dai lilam noh ya oo wei ka poisa wa mih na uni daw lai ko cha ka sorkar wei ki tre ym ye de ki wow wan kam ya ka poisa wa mih na uni u mooyong hadien wa dep dai lilam.
