Ka Meghalaya Biodiversity Board ynne da lehkmen ko ya ka International Day for Biological Diversity (IDB) 2023 hajrong ka phang wa ong “From Agreement to Action: Build Back Biodiversity” ha U Soso Tham Auditorium, Shillong heiwa u D.P. Wahlang, Chief Secretary da embyntalang u kam u kongsan.
U kongsan deilang waka R.M Kurbah, Deputy Commissioner, East Khasi Hills District, u S.M.A. Razi, Commissioner & Secretary, Forest and Environment cum Chairman, Meghalaya Biodiversity Board, u R.S. Gill, PCCF & HOFF wa u SM Sahai PCCF & Chief Wildlife Warden da pynlait ki leh ya ki Poster kiwa pynyoo yei mahajon ka bei rymaw ka jylla Meghalaya deilang wa ki kot lakdop kiwa khana chaphang ki thaw wa pawnaam wa boon ki mrad khloo wei ha kani ka jooh ka yalang da saam leh ya ki khusnaam chwa kiwa jop ha ka yakob Quiz wa i yakob chondur kiwa da pynman kam chibynta kani ka lehkmen.
Neiliang u Chief Secretary da ong u wa ka phang pyrdi ha uni u snem daw pynchlur ko ya ki bru wow pynyoo ki da ki kaam yow pynim pynmahajon biang yeiwa em ha ka bei rymaw. Da ban joor u leh yei kaamram yong uwi pa uwi wow yada ya ka rymaw deiwa ong leh wa emkaam wow sikai ya ki paidbah hajrong ini waroh.
Chooh chooh da ong u wa neiliang ka United Nations da rai ko wow lehkmen ya kani ka sngi yow man ko kam chibynta wow pynsñiawthooh paidbah yei kordor ka bei rymaw khamtam ha kitu kiwa dang khynroo neibhah hap pyrkhat noh da iwi yei rukom emyatoh ki bru waka rymaw.
Da ong u leh wa emkaam wa waroh ki Biodiversity Management Committees (BMC) wa em hapoh ka jylla wow lai khana paidbah ki kammon wow yada ya ki soodong ka chnong ka thaw nadooh ki dieñ ki siej wa waroh kiwa em wa kyrchaan ha ka bei rymaw deiwa booh leh ya ka People’s Biodiversity Register (PBR).
Ha kani ka sngi, u kongsan da saam u leh ya ka khusnaam Best Biodiversity Management Committee (BMC) Award 2023 cha ka Umtngam BMC kawa em hapoh ka Bhoirymbong C&RD Block, Ri Bhoi District katwa yei naam State Level Best Biodiversity Conservation Award da yoh u Tyngshainlang Dewkhaid uwa na Phlangwanbroi, Mawsynram, East Khasi Hills uwa da kreh yow pynneh pynsah ya ka rymaw.
Kani ka International Day for Biological Diversity kawa tip leh kam ka World Biodiversity Day da leh burom ya ka ha man ka 25 tarik u Naisan yow pynkynmoo paidbah yei man kordor ka beirymaw.
